झापाको बिर्तामोड-३ मा अवस्थित लिङ्कन मन्टेश्वरी स्कुलमा बाबुको मुख हेर्ने दिन तथा पितृसम्मान दिवस मनाइएको छ ।
मन्टेश्वरीमा अध्ययनरत नानुबाबुहरुले आफ्ना आमा, बुबा तथा हजुरबुबा-हजुरआमालाई खादासहित मायाको चिनो दिएर बाबुको मुख हेर्ने दिन मनाइएको हो ।
विद्यालय व्यवस्थापन समितिका अध्यक्ष दिनेश ओझाको अध्यक्षतामा भएको कार्यक्रममा विद्यार्थी, शिक्षक तथा अभिभावकको उल्लेख्य सहभागिता रहेको थियो ।
बाबुको अथक माया, मार्गदर्शन र जीवनभरको योगदानप्रति सम्मान व्यक्त गर्दै यस्ता कार्यक्रमले विद्यार्थीमा संस्कार, मूल्य र परिवारप्रतिको कदर गर्ने चेतना अभिवृद्धि हुने विश्वास लिएको मन्टेश्वरीका सञ्चालक सरोज पौडेलले बताए ।
आजको दिन छोराछोरीले जीवित बाबुलाई आफूलाई मन पर्ने मिठाइ तथा भोजन खुवाएर आदर-सम्मान प्रकट गर्छन् र बाबुको आशीर्वाद लिने चलन छ भने बाबु दिवङ्गत भइसकेकाहरूले भने विभिन्न तीर्थस्थलमा पुगेर बाबुको नाममा तर्पण, पिण्डदान तथा श्राद्ध गर्ने र सिदादान गर्ने गर्दछन् ।
उक्त कार्यक्रमको सञ्चालन शिक्षक रेनुका कटुवालले गरेकी थिइन् ।
