झापाको बिर्तामोडमा अवस्थित चिल्ड्रेन इन्भेरोमेन्ट स्कुलमा प्रथम जिल्लास्तरीय योङ्ग आट्रीष्ट एक्टिङ्ग बुटचेम्प २०२६ (Young Artists’ Acting Bootcamp 2026)आयोजना हुने भएको छ ।
चिल्ड्रेन इन्भेरोमेन्ट स्कुल थेटर क्लबको आयोजना तथा चुनुमुनु थेटर काठमाडौँको सहकार्यमा तीनदिने कार्यशालाको आयोजना गरिएको हो ।
बाल दिवसको अवसर पारेर भाद्र २७ देखि २९ गते सम्म हुने कार्यशालामा झापाका विभिन्न विद्यालयमा Theatrical Art अध्ययन गरिरहेका विद्यार्थीहरू सहभागी हुनेछन् ।
उक्त चेम्पको मुख्य प्रशिक्षकमा चुनुमुनु थेटरका निर्देशक तथा अन्तर्राष्ट्रिय रूपमा ख्यातिप्राप्त अभिनय प्रशिक्षक राजन भुजेल रहेका छन् ।
Abstract Acting मार्फत कल्पना, प्रतीक, अमूर्त विचार तथा भावनालाई शरीर, हाउभाउ, गति र आवाजको सिर्जनात्मक प्रयोगद्वारा मञ्चमा प्रभावकारी रूपमा अभिव्यक्त गर्न सक्षम बनाउने रहेको विद्यालयका प्रिन्सिपल सन्तोष सुब्बाले जानकारी दिए ।
अभिनयमा परम्परागत संवाद र यथार्थवादी प्रस्तुतिभन्दा बाहिर रही शरीर, स्पेस, लय, मौनता, ध्वनि तथा प्रतीकात्मक क्रियाको प्रयोगबाट दृश्य र भाव सिर्जना गर्ने क्षमता विकास गर्ने लक्ष्य कार्यशालाको रहेको प्रिन्सिपल सुब्बाले बताए ।
कार्यशालाका संयोजक दिनेश राज शर्माका अनुसार कार्यशालाको उद्देश्य विद्यार्थीहरूको सिर्जनशील सोच, कल्पनाशक्ति, स्पोटेन्याटि र व्यक्तिगत अभिव्यक्तिलाई प्रोत्साहन गर्दै नयाँ तथा मौलिक अभिनय शैलीको खोजी गर्न सक्षम बनाउनुका साथै बालबालिकाको आवाज, शरीर, अभिव्यक्ति, भाव, हाउभाउ र मञ्चीय उपस्थितिको विकास गर्नु रहेको छ ।
