झापाको बिर्तामोड-७ विरानमा अवस्थित कञ्चन इङ्लिस बोर्डिङ स्कुलले गत भदौ १० गते भोटेकोशीमा आएको भीषण बाढीबाट ठूलो धनजनको क्षति भएपछि प्रधानमन्त्री दैवीप्रकोप उद्धार कोषमा ३० हजार १३५ रुपैयाँ सहयोग गरेको छ ।
मंगलबार साँझ बाढी तथा प्राकृतिक विपद्का कारण ज्यान गुमाएकाहरूप्रति श्रद्धाञ्जली अर्पण गर्दै विद्यालय परिसरमा श्रद्धाञ्जली सभा तथा दीप प्रज्वलनसहित पीडित परिवारप्रति समवेदना व्यक्त गर्दै विपद्को समयमा सहयोग र ऐक्यबद्धताको सन्देश समेत दिइएको थियो ।
कञ्चन बाल क्लबको समन्वयमा विद्यालयका विद्यार्थी, शिक्षक तथा कर्मचारीबाट राहत रकम सङ्कलन गरिएको हो । सङ्कलित ३० हजार १३५ रुपैयाँ पुनर्निर्माण, आर्थिक पुनरुत्थान तथा राहतका लागि प्रधानमन्त्री दैवीप्रकोप उद्धार कोषमा आधिकारिक क्युआरमार्फत पठाइएको विद्यालयले जनाएको छ ।
विद्यालयका प्रधानाध्यापक दीपक चम्लागाईंले विपद्को कठिन घडीमा बाढीपीडितको पीडामा साथ दिन विद्यालय परिवारले सहयोग गरेको बताए । विद्यार्थीलाई किताबी ज्ञानमा मात्र सीमित नराखी सामाजिक उत्तरदायित्व, मानवीय भावना र सहयोगी संस्कारको विकास गराउनु विद्यालयको उद्देश्य रहेको उनको भनाइ छ ।
विद्यालयमा हाल पीजीदेखि कक्षा १० सम्म पठनपाठन हुँदै आएको छ । विद्यालयमा ६ सय २० जना विद्यार्थी अध्ययनरत छन् भने शिक्षक तथा कर्मचारी गरी ४५ जना कार्यरत छन् ।
विद्यालयले विद्यार्थीहरूको क्षमता विकासका लागि पाठ्यक्रममा आधारित अध्ययनसँगै अतिरिक्त तथा रचनात्मक क्रियाकलापमा समेत सक्रिय रूपमा सहभागी गराउँदै आएको छ । विद्यार्थीमा नेतृत्व क्षमता, सिर्जनशीलता, सामाजिक उत्तरदायित्व तथा मानवीय भावनाको विकास गराउने उद्देश्यले विद्यालयले विभिन्न गतिविधि सञ्चालन गर्दै आएको जनाएको छ ।
उक्त कार्यक्रममा विद्यार्थी, शिक्षक तथा कर्मचारीको सहभागिता रहेको थियो भने विद्यालयका शिक्षक लोकबहादुर लिम्बुले श्रद्धाञ्जली गीत प्रस्तुत गरेका थिए ।
