शिक्षामन्त्री सस्मित पोखरेल सामुदायिक विद्यालयको अवस्था बुझ्न अवलोकन सुरु गरेका छन्।
शिक्षामन्त्री पोखरेलले सामुदायिक विद्यालयको वास्तविक अवस्था बुझ्न भन्दै काठमाडौँका विभिन्न विद्यालयको अवलोकन गरेर अभियान थालेका हुन् ।
खेलकुदमन्त्री समेत रहेका पोखरेलले अवलोकन गरेका विद्यालयहरूमा बाल विकास आधारभूत विद्यालय, पञ्चकन्या माध्यमिक विद्यालय, आत्म विकास आधारभूत विद्यालय र बूढानीलकण्ठ उच्च माध्यमिक विद्यालय रहेका छन् ।
मन्त्री पोखरेलले काठमाडौँका चार सामुदायिक विद्यालयमा पुगेर विद्यालय प्रशासन, प्रधानाध्यापक, शिक्षक तथा विद्यार्थीहरूसँग अन्तरक्रिया गरे । उनले विद्यालयको समग्र अवस्था, पठनपाठनको स्थिति, विद्यार्थीका समस्या तथा विद्यालय सुधारका लागि आवश्यक पहलका विषयमा जानकारी लिएका थिए ।
शिक्षा मन्त्रालयले सामुदायिक विद्यालयको वास्तविक अवस्था पहिचान गरी देखिएका समस्या समाधान, आवश्यक सुधार तथा प्रभावकारी समन्वयका लागि विद्यालय अवलोकन अभियानलाई देशभर निरन्तरता दिने जनाएको छ ।
सामुदायिक विद्यालयको शैक्षिक अवस्था, पठनपाठनको स्थिति, विद्यालय व्यवस्थापन तथा विद्यार्थीका समस्या र आवश्यकताबारे प्रत्यक्ष जानकारी लिन मन्त्रालयले देशभरका सामुदायिक विद्यालयको अवलोकन गर्ने अभियान सुरु गरेको मन्त्रालयको दाबी छ ।
