झापाको हल्दीबारी माध्यमिक विद्यालयका पूर्व विद्यार्थीहरूले आफ्ना आमाबुवाको नाममा ५ लाख रुपैयाँ बराबरको अक्षयकोष स्थापना गरेका छन् ।
हल्दीबारी गाउँपालिका-२ निवासी स्वर्गीय टेकबहादुर चम्लागाईं र आमा भोलादेवी चम्लागाईंको स्मृति तथा सम्मानमा उनीहरूका सन्तानले उक्त कोषको स्थापना गरेका हुन् ।
विद्यालयमा आयोजित एक कार्यक्रमका बीच पूर्व विद्यार्थीहरू ज्ञानेन्द्रकुमार चम्लागाईं, फडेन्द्रकुमार चम्लागाईं, मुनादेवी चम्लागाईं (थापा), चम्पादेवी चम्लागाईं (ओली) र माया चम्लागाईं (थापा)ले ५ लाख रुपैयाँको चेक प्रधानाध्यापक टङ्कबहादुर पाख्रिनलाई हस्तान्तरण गरेका थिए ।
उक्त अक्षय कोषको ब्याजबाट प्रत्येक वर्ष कक्षा ६ देखि १० सम्म अध्ययनरत उत्कृष्ट विद्यार्थीलाई छात्रवृत्ति प्रदान गरिनेछ । नेपाली र अङ्ग्रेजी माध्यमका पाँच-पाँच जना गरी वार्षिक १० जना विद्यार्थीलाई दामासाहीका हिसाबले छात्रवृत्ति रकम वितरण गरिने विद्यालय प्रशासनले जनाएको छ ।
चेक हस्तान्तरण गर्दै परिवारका ज्येष्ठ सुपुत्र ज्ञानेन्द्रकुमार चम्लागाईंले आफूहरूले पढेको विद्यालयका भाइबहिनीको पढाइमा सहयोग पुगोस् भन्ने उद्देश्यले स्वर्गीय बुवाको पुण्य स्मृति र आमाको सम्मानमा कोष स्थापना गरिएको बताए ।
विद्यालयका प्रधानाध्यापक पाख्रिनले आफ्ना जन्मदाताको नाममा अक्षयकोष स्थापना गरेर विद्यालयको शैक्षिक विकासमा योगदान पुर्याउनु प्रशंसनीय कार्य भएको बताए ।
