झापाको बिर्तामोड-२ स्थित निदि अङ्ग्रेजी माध्यमिक विद्यालयमा गठन भएको निदि बाल क्लबको नयाँ कार्यसमितिले एक विशेष कार्यक्रमका बीच पद तथा गोपनीयताको सपथ ग्रहण गरेको छ ।
बालबालिकामा नेतृत्व विकास, सामाजिक उत्तरदायित्व र रचनात्मक क्षमताको अभिवृद्धि गर्ने उद्देश्यले गठित क्लबको अध्यक्षमा रितिका शाह निर्वाचित भएकी छन् ।
क्लबको वरिष्ठ उपाध्यक्षमा अंश सुवेदी, उपाध्यक्षमा करिस्ता चापागाईं, सचिवमा मनिता भट्टराई, सहसचिवमा सुलभ आचार्य तथा कोषाध्यक्षमा अभियान थापा सर्वसम्मत चयन भएका छन् ।
त्यसैगरी सदस्यहरूमा आयुष हजाम, अंशु लिम्बु, आरएन काफ्ले, हङ्सिका चौधरी, श्रीजेश शिवाकोटी, श्रीनवी प्रसाईं, सम्राट सापकोटा र आरोसी चिमरिया चयन भएका छन् ।
त्यस्तै फोकल पर्सनमा शिक्षक घनश्याम पौडेल चयन भएका छन् ।
निदि बाल क्लबका निवर्तमान अध्यक्ष प्रियंसु ढकालको अध्यक्षतामा भएको कार्यक्रममा बालबालिका तथा सञ्चार मञ्च झापाका संयोजक तथा पत्रकार सरोज पौडेल प्रमुख अतिथि रहेका थिए ।
विद्यालयका प्रधानाध्यापक भीष्म प्रसाईंले कार्यक्रमको औचित्यमाथि प्रकाश पार्दै बालबालिकाको नेतृत्व क्षमता विकास, अनुशासन, जिम्मेवारीबोध तथा सामाजिक चेतनाको अभिवृद्धिका लागि बाल क्लब महत्वपूर्ण माध्यम भएको बताए ।
उनले विद्यालयले विगतदेखि नै बालबालिकालाई अतिरिक्त क्रियाकलापमा सक्रिय सहभागिता गराउँदै आएको उल्लेख गर्दै सार्वजनिक वक्तृत्वकला, रचनात्मक लेखन, सामाजिक अभियान, सरसफाइ कार्यक्रम, विविध दिवस मनाउने गतिविधि तथा बौद्धिक प्रतियोगितामार्फत विद्यार्थीको सर्वाङ्गीण विकासमा जोड दिँदै आएको बताएका छन् ।
कार्यक्रममा निवर्तमान कार्यसमितिका तर्फबाट अध्यक्ष प्रियंसु ढकाल र नवनिर्वाचित कार्यसमितिका तर्फबाट अध्यक्ष रितिका शाह तथा सचिव मनिता भट्टराईले माइन्युट हस्तान्तरण गर्दै औपचारिक रूपमा पद हस्तान्तरण समेत गरेका थिए ।
उक्त अवसरमा नवनिर्वाचित कार्यसमितिका सदस्यहरूलाई बाल क्लबको आधिकारिक टिसर्ट समेत वितरण गरिएको थियो ।
प्रमुख अतिथि सरोज पौडेल र प्रधानाध्यापक भीष्म प्रसाईंले संयुक्त रूपमा नवनिर्वाचित पदाधिकारी तथा सदस्यहरूलाई खादा, माला तथा दोसल्ला ओढाएर बधाई तथा शुभकामना व्यक्त गरेका थिए ।
प्रमुख अतिथि पौडेलले नेतृत्व प्राप्त गर्नु मात्र ठूलो कुरा नभई सबैलाई समेटेर जिम्मेवारी सफलतापूर्वक निर्वाह गर्नु नै नेतृत्वको वास्तविक परीक्षा भएको बताए ।
क्लबका सचिव त्रिविन सुवेदीले स्वागत मन्तव्य राखेको कार्यक्रमको सञ्चालन शिक्षक तथा फोकल पर्सन घनश्याम पौडेलले गरेका थिए ।
