झापाको बिर्तामोडमा पत्रकारितामा प्रविधिको प्रयोग विषयक तालिम सम्पन्न भएको छ ।
प्रेस सेन्टर नेपाल जिल्ला समन्वय समिति झापाको आयोजनामा प्रविधिले मारेको फड्कोसँगसँगै पत्रकारितामा आफूलाई हिँड्न सघाउने उद्देश्यले कार्यक्रम आयोजना गरिएको हो ।
प्रेस सेन्टर नेपाल जिल्ला समन्वय समिति झापाका अध्यक्ष पुष्प खड्काको अध्यक्षतामा भएको कार्यक्रमका प्रमुख अतिथी बिर्तामोड नगर उपप्रमुख नगेन्द्रप्रसाद संग्रौलाले पत्रकारले खोजमुलक र तथ्यपरक समाचार लेखनमा जोड दिनुपर्ने बताए । नराम्रा टिकाटिप्पणी र भ्युज बढाउने भन्दा पनि मुलधारका मिडियाले सत्य तथ्यमा आधारित रहेर सकारात्मक समाचार लेख्नु पर्ने उनको भनाई थियो ।
एआईको प्रयोगले पत्रकारिता पेशालाई कसरी सहज र सरल बनाउँछ भन्ने बारेमा प्रशिक्षक उमाकान्त खनालले सहभागीहरुलाई जानकारी गराएका थिए । उनले पत्रकारितामा एआईको सहयोग लिइए पनि अन्तिम सम्पादक मानव नै हुनुपर्ने बताए ।
बिर्तामोड नगरपालिकाको आर्थिक सहयोगमा भएको कार्यक्रममा नेपाल पत्रकार महासंघ झापाका अध्यक्ष एकराज गिरी, नेपाल पत्रकार महासंघ कोशी प्रदेश सदस्य राजकुमार ओली, प्रेस चौतारी नेपाल झापा अध्यक्ष प्रदिप परियार, नारी सञ्चार गृह झापाकी अध्यक्ष स्वस्तिका आचार्य, पर्यटन पत्रकार मञ्च झापाका अध्यक्ष कमलप्रसाद पाण्डे (विनोद) लगायतले शुभकामना मन्तव्य राखेका थिए ।
प्रेस सेन्टर नेपाल जिल्ला समन्वय समिति झापाका उपाध्यक्ष होमप्रकाश अधिकारीले स्वागत गरेको कार्यक्रमको सञ्चालन सहसचिव राजन साम्पाङले गरेका थिए ।
