‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ झापाको बिर्तामोडमा ’दोस्रो मेयर कप २०८३ अन्तर वडा कराँते तथा किक बक्सिङ प्रतियोगिता’ सुरु भएको छ ।
नगर खेलकुद विकास समितिका कार्यवाहक अध्यक्ष सन्तोष गुरुङको अध्यक्षतामा एक विशेष समारोहका बीच बिर्तामोड नगरपालिकाकी नगर प्रमुख पवित्रा महतारा प्रसाईंले प्रतियोगिताको उद्घाटन गरेकी हुन् ।
बिर्तामोड नगर खेलकुद विकास समितिको आयोजनामा आज र भोलि सञ्चालन हुने यस प्रतियोगितामा बिर्तामोड नगरपालिकाका १० वटै वडाका प्रतिभावान खेलाडीहरूको उत्साहजनक सहभागिता रहेको छ ।
स्थानीयस्तरमा रहेका खेलाडीहरूको पहिचान गरी उनीहरूलाई राष्ट्रिय स्तरसम्म पु¥याउने र खेलकुदको माध्यमबाट नगरलाई चिनाउने उद्देश्यले प्रतियोगिताको आयोजना गरिएको आयोजकले जनाएको छ ।
प्रतियोगितामा प्रथम हुनेले नगद ५० हजार, द्वितीय नगद २५ हजार र तृतीय स्थान हासिल गर्नेले नगद १५ हजार रुपैयाँका साथै ट्रफी, मेडल र प्रमाणपत्र प्राप्त गर्ने प्रतियोगिताका संयोजक सुदीप खवासले बताए ।
उत्कृष्ट खेल प्रदर्शन गर्ने महिला र पुरुषतर्फका एक-एक जना ’बेस्ट फाइटर’लाई जनही ५ हजार रुपैयाँ पुरस्कार प्रदान गरिनेछ ।
नगर खेलकुद विकास समितिका सदस्य रमेश उप्रेतीले स्वागत गरेको कार्यक्रमको सञ्चालन समितिका सचिव विशन लिम्बूले गरेका थिए ।
