एकदिवसीय अभ्यास शृङ्खलाको दोस्रो खेलमा नेपालको ‘ए’ टोलीले अमेरिकालाई तीन विकेटले हराएको छ ।
अमेरिकाले दिएको २६३ रनको लक्ष्य नेपाल ‘ए’ ले ४९ ओभर १ बलमा ७ विकेट गुमाएर भेटाएकोे हो । नेपाल ‘ए’ का मयन यादवले ७२ रन बनाएको खेलमा अमेरिकाका मिलिन्द कुमारले २ विकेट लिएका थिए ।
यसअघि माथिल्लो मूलपानी मैदानमा टस जितेर ब्याटिङ गरेको अमेरिकाले ५० ओभरमा ८ विकेट गुमाएर २६२ रन बनाएको थियो ।
अमेरिकाका स्मित पटेलले शतक बनाए । पटेल १०८ बलमा ११६ रन जोडेर आउट भए । नेपाल ‘ए’ का पवन सर्राफले २ तथा विपिन खत्री, शाहब आलम, बसिर अहमद, शेर मल्ल, रशिद खान र नारायण जोशीले १-१ विकेट लिएका थिए ।
एकदिवसीय अभ्यास शृङ्खलाको पहिलो खेलमा बिहीबार नेपाल ‘ए’ ले स्कटल्यान्डलाई ४५ रनले हराएको थियो ।
आईसीसी क्रिकेट विश्वकप लिग-२ खेल्न नेपाल आएका अमेरिका र स्कटल्यान्ड टोलीसँग नेपाल ‘ए’ ले एकदिवसीय अभ्यास शृङ्खला खेलिरहेको हो । नेपाल ‘ए’ ले स्कटल्यान्ड र अमेरिकासँग २-२ वटा अभ्यास खेल खेल्ने छ ।
