झापाको मेचीनगरमा अवस्थित इष्ट होराइजन अंग्रेजी माध्यमिक विद्यालयमा शनिबार ‘करियर काउन्सिलिङ’ कार्यक्रम आयोजना गरिएको छ ।
पूर्वमै सम्भवत पहिलो पटक आयोजना भएको उक्त कार्यक्रममा विभिन्न १३ वटा भन्दा बढी विधाका विषय छनोट गरेर तिनीहरुका स्टल राखिएको थियो । हरेक स्टलहरुमा विषयगत विज्ञहरुले सहजीकरण गरेका थिए ।
विद्यालय व्यवस्थापन समितिका अध्यक्ष माधव पौडेलको अध्यक्षतामा भएको कार्यक्रमको प्रमुख अतिथि अग्रज पत्रकार चन्द्र भण्डारी रहेका थिए ।
विद्यालय परिसरमा आयोजित करियर काउन्सिलिङ कार्यक्रममा एआई, मेडिसिन हेल्थ, विजनेश, जोर्नालिजम, एग्रीकल्चर, ल, हस्पिटालिटी, सिभिल सर्भिस, इन्जिनियरिङ, एजुकेसन, आर्टस्, स्पोट्रस लगायतका स्टल प्रदर्शनीमा राखिएको थियो ।
विद्यार्थी र अभिभावकहरुको उल्लेख्य उपस्थिति रहेको उक्त विषयगत स्टलहरु मध्ये एआई र मेडिसिन हेल्थमा अवलोकनकर्ताहरुले रुचिका साथ जिज्ञासा राखेको पाइएको छ ।
विद्यार्थीलाई भविष्यमा कुन विषय बढ्दा उपयुक्त हुन्छ भनेर सहयोग पुग्ने उद्देश्यले नौलो र उपयोगी कार्यक्रम आयोजना गरिएको विद्यालयका प्रिन्सिपल सन्जिव राईले बताए ।
आगामी दिनमा यसखाले कार्यक्रमलाई निरन्तरता दिइने पनि प्रिन्सिपल राईले जानकारी दिए । कार्यक्रममा विशेषगरी विद्यालयका कक्षा ८, ९ र १० विद्यार्थी सहभागी थिए । अन्य विद्यालयका शिक्षक तथा विद्यार्थी समेतले शैक्षिक स्टलहरुको अवलोकन गरेका थिए ।
