झापाको बिर्तामोड-९ गरामनीस्थित श्री दुर्गा माध्यमिक विद्यालयमा अध्ययन गरी २०६३ सालमा प्रवेशीका परीक्षा एसएलसी उत्तीर्ण गरी विद्यालय छोडेका विद्यार्थीहरूको ब्याचले विद्यार्थी पुनर्मिलन कार्यक्रम तथा गुरुहरूलाई सम्मान गरेको छ ।
झापाको प्रसिद्ध पर्यटकीयस्थल दोमुखामा आयोजित कार्यक्रमका बीच करिब एक दर्जन तत्कालीन शिक्षकहरूलाई सम्मान गरेका हुन् ।
विद्यार्थी पुनर्मिलन तथा शिक्षक सम्मानका साथ वनभोज कार्यक्रममा सम्मानित हुनुहुने तत्कालीन शिक्षकहरू कृष्णप्रसाद पाठक, धर्मेन्द्र भट्टराई, निरतलाल राजवंशी, नारायण तिम्सिना, खिलप्रसाद शिवाकोटी, रामप्रसाद अधिकारी, कुमार खरेल, डिल्लीराम प्रसाईं, खेमबहादुर बस्नेत, लालबहादुर कार्की र देवीप्रसाद पराजुली लगायत रहेका छन् ।
सम्मान कार्यक्रममा शिक्षकहरू धर्मेन्द्र भट्टराई, कृष्णप्रसाद पाठक, रामप्रसाद अधिकारी र खिलप्रसाद शिवाकोटी लगायतले पुनर्मिलन कार्यक्रमको आयोजना गरेर शिक्षकलाई समेत सम्मान गरेकोमा धन्यवाद ज्ञापन गरेका थिए ।
शिक्षक र विद्यार्थीहरूले संयुक्त नृत्य समेत प्रस्तुत गरेको कार्यक्रममा एक आपसमा भलाकुसारी साथै विगतका यादहरु साटासाट गर्दै आफ्नो विद्यालय जीवनका अनुभवहरू एकअर्कामा आदानप्रदान समेत गरेका थिए ।
यसैबीच २०६३ सालको ब्याचले विद्यालयको क्षेत्रमा सहयोग पुर्याउने उद्देश्यले पूर्व विद्यार्थी समाज समेत गठन गरेको छ ।
