झापाको हल्दीबारी गाउँपालिकामा १६औँ राष्ट्रपति रनिङ शिल्ड प्रतियोगिता सोमबारदेखि सुरु भएको छ ।
विद्यालयस्तरका खेलाडीबीच प्रतिस्पर्धा गराउने उद्देश्यका साथ आयोजना गरिएको प्रतियोगिता तीन दिनसम्म सञ्चालन हुनेछ ।
प्रतियोगिताको उद्घाटन १६औँ राष्ट्रपति रनिङ शिल्ड प्रतियोगिता आयोजक समितिका संयोजक सन्तकुमार थापाको अध्यक्षता तथा हल्दीबारी गाउँपालिका अध्यक्ष रविन्द्रप्रसाद लिङदेनको प्रमुख आतिथ्यमा सम्पन्न भएको हो ।
उद्घाटन कार्यक्रममा गाउँपालिकाका प्रमुख प्रशासकीय अधिकृत मानबहादुर वन ‘महेन्द्र’, नेकपा एमाले गाउँ कमिटी अध्यक्ष त्रिलोचन सापकोटा, हल्दीबारी माध्यमिक विद्यालयका प्रधानाध्यापक टंकबहादुर पाख्रिन लगायतले शुभकामना मन्तव्य राखेका थिए ।
हल्दीबारी-१ का अध्यक्ष देवीबहादुर थापाले स्वागत मन्तव्य राखेको कार्यक्रमको सहजीकरण जनजागृति माविका शिक्षक झमक तिम्सिनाले गरेका थिए ।
उक्त प्रतियोगितामा हल्दीबारी गाउँपालिका भित्रका १३ वटा विद्यालय सहभागी छन् । आयोजक समितिका अनुसार प्रतियोगितामा करिब १२०० जना छात्र-छात्राको सहभागिता रहनेछ । खेलाडीले २२ वटा खेल विधामा प्रतिस्पर्धा गर्नेछन् ।
प्रतियोगितामा ४२ स्वर्ण, ४२ रजत र ५४ कास्य पदकका लागि प्रतिस्पर्धा हुनेछ । प्रतियोगिताका विजयी खेलाडीलाई मेडल, ट्रफी र प्रमाणपत्र प्रदान गरिनेछ भने समग्र प्रतियोगितामा प्रथम र द्वितीय हुने विद्यालयलाई विशेष ट्रफी प्रदान गरिने आयोजक समितिले जनाएको छ ।
