इन्डो नेपाल मेचीनगर मिडिया फुटबल कपको उपाधि तराई प्रेस क्लब दार्जिलिङले जितेको छ ।
काँकरभिट्टा माविको खेल मैदानमा सोमबार भएको फाइनल खेलमा भद्रपुर प्रेस क्लबलाई २-० गोल अन्तरले पराजित गर्दै दार्जिलिङले उपाधि जितेको हो ।
तराईले उपाधिसँगै नगद ५० हजार रुपैयाँ हात पारेको छ भने उपविजेता बनेको भद्रपुरले नगद २५ हजार रुपैयाँ प्राप्त गरेको छ ।
प्रतिस्पर्धात्मक रहेको फाइनल खेलको दोस्रो हाफमा तराईले दबाब सिर्जना गरेको थियो । खेलको ३२ औँ मिनेटमा विजेता दार्जिलिङका प्रवेश भुजेलले गोल गर्दै आफ्नो टिमलाई अग्रता दिलाएका थिए । लगत्तै खेलको ४४ औँ मिनेटमा दावा लामाले गोल गर्दै टिमको अग्रता दोब्बर बनाएका थिए । खेलमा अन्तिम गोल गरेका दावा फाइनल खेलको म्यान अफ द म्चाय घोषित भए । उनले नगद ११ सय प्राप्त गरेका छन् ।
प्रेस क्लब मेचीनगरका अध्यक्ष प्रकाश पौडेलको अध्यक्षतामा भएको समापन समारोहमा विजेतालाई प्रमुख अतिथि मेचीनगर नगरपालिका प्रमुख गोपालचन्द्र बुढाथोकीलगायतले पुरस्कृत गरेका थिए ।
प्रतियोगिता भरिको उत्कृष्ट खेलाडी भद्रपुर प्रेस क्लबका सुशान्त नेपाल घोषित भए भने उत्कृष्ट फर्वार्डको रुपमा आयोजक प्रेस क्लब मेचीनगरका युवराज आचार्य, उत्कृष्ट डिफेन्डरमा भद्रपुरका राजु पाठक, उत्कृष्ट गोल किपरमा भद्रपुरकै सुजक राउत घोषित भएका छन् ।
प्रतियोगितामा सर्वाधिक गोलकर्ताको रुपमा विजेता तराई प्रेस क्लबका प्रवेश भुजेल पुरस्कृत भएका छन् ।
प्रेस क्लब मेचीनगरद्वारा आयोजना गरिएको दुई दिने प्रतियोगिताको संरक्षकमा मेचीनगर नगरपालिका रहेको थियो । मिडिया कपमा भारतका २ तथा नेपालका ६ गरी ८ वटा प्रेस क्लब सहभागी थिए ।
उपाध्यक्ष खगेन्द्र घिमिरेले स्वागत गरेको समापन समारोहको सञ्चालन सचिव प्रविण अधिकारीले गरेका थिए ।
