छाला मानव शरीरको सबैभन्दा ठूलो अंग हो । जसको बाहिर वातावरण प्रत्यक्ष सम्पर्क रहन्छ । छालालाई बाहिरी तथा भित्रि कारणहरुले असर गरिरहेको हुन्छ । लगातार घाममा बस्नु, धुलो, प्रदुषण घाम, विभिन्न प्रकारका कस्मेटिकहरुको प्रयोग जस्ता बाहिरी कारणले छालालाई असर गरिरहेको हुन्छ ।
शरीरभित्र रहेका विभिन्न रोगहरु थाइराइड, सुगर, हर्माेनल परिवर्तन लगायतले पनि छालालाई असर गरिरहेको हुन्छ । यसरी भित्रि तथा बाहिर जुनसुकै कारणले पनि छालामा असर गरिरहेको हुन्छ । अनुहारको छाला सबैभन्दा धेरै बाहिरी वातारणसँग सम्पर्कमा रहन्छ । अनुहारमा विभिन्न प्रकारका क्रिमको प्रयोग, अन्य अंगको छालाको तुलनामा अनुहारको छाला पातलो तथा संवेदनशील हुनु जस्ता कारणले अनुहारको छालामा अन्य अंगको छालाको तुलनामा बढी समस्या आउने गर्छ ।
अनुहारमा फेसवास वा साबुन कुन प्रयोग गर्ने ?
साबुनमा अल्कालाइन नामक तत्व हुने भएकोले यसको प्रयोगले अनुहारमा रहेका फोहोर तत्व मात्रै नभई प्राकृतिक रुपमा रहेको चिल्लोपनालाई पनि फोहोरसँगै लैजान सक्छ । त्यसकारण साबुनको प्रयोगले अनुहारको छालालाई सुख्खा पार्ने, डन्डीफोरको समस्या ल्याउने हुन सक्छ । त्यसकारण अनुहारको छालाको लागि साबुनको प्रयोग त्यति राम्रो मानिदैन । फेसवासमा मोस्चराइजर पनि राखिएको हुनाले अनुहारमा साबुनको सट्टा फेसवासको प्रयोग राम्रो मानिन्छ ।
त्यसो भन्दैमा छालामा धेरै र कडा खालको फेसवासको प्रयोग भने राम्रो मानिदैन । सकेसम्म छालाको प्रकृति अनुसार छालाा रोग विशेषज्ञको सल्लाहमा फेसवासको प्रयोग गर्नु छाला स्वास्थ्यका लागि राम्रो हो । छालाको प्रकृति अनुसार दैनिक एक पटक फेसवासको प्रयोग र मुख धुनु राम्रो हो । फेसवासको प्रयोग गर्दा सुरुको अवस्थामा भने छाला रोग विशेषज्ञको सल्लाहमा प्रयोग गर्नु राम्रो मानिन्छ ।
विज्ञापनका आधारमा कस्मेटिकको प्रयोग हुन सक्छ हानिकारक
पछिल्लो समय सामाजिक सञ्जालका प्रयोगकर्ताहरुले विज्ञापनका आधारमा विभिन्न प्रकारमा कस्मेटिक तथा क्रिमहरुको प्रयोग गर्ने गरेको पाइन्छ । यसरी छाला रोग विशेषज्ञको सल्लाह बिना नै यस्ता सामग्रीहरुको प्रयोग गर्नु छालाका लागि हानिकारक हो । यस्ता सामग्रीहरुले छालामा सुख्खापना, एलर्जी, पातलो बनाउने लगायतका समस्या देखिन सक्छ । कतिपय कस्मेटिकमा क्यान्सर गराउने तत्वहरु पनि मिसावट गरिएको हुन सक्छ ।
छालालाई स्वस्थ र चम्किलो राख्नका लागि सन्तुलित भोजन तथा जीवनशैली पनि उतिकै महत्वपूर्ण मानिन्छ । यसका साथै पर्याप्त पानी, निन्द्रा, तनावमुक्त जीवनशैली, रक्सी तथा चुरोटको सेवन नगर्नु पनि छालाको स्याहारका लागि उतिकै महत्वपूर्ण हुन्छ । यसका साथै छाला रोग विशेषज्ञको सल्लाहमा क्रिम तथा मोस्चराइजरको प्रयोग गर्नुपर्छ । छाला राम्रो र चम्किलो बनाउनका लागि विभिन्न प्रकारका घरेलु उपायहरु दही, कागती, बेसार लगायतको प्रयोग छालाका हानिकारक हुन सक्छ । छोटो समयका लागि त्यसले छाला चम्किलो बनाए पनि दीर्घकालीन रुपम भने फाइदाजनक हुँदैन ।
छालामा एन्टी एजिङ ट्रिटमेन्ट प्रविधि
छालालाई बुढ्यौली ढिलो गराउनका लागि पछिल्लो समय एन्टी एजिङ ट्रिटमेन्ट प्रविधिको विकास गरिएको छ । उमेरसँगै छालामा आउने चाउरीपना कम गराउनका लागि यो प्रविधिको प्रयोग हुन्छ । छालालाई बुढ्यौलीसम्म पनि राम्रो बनाउनका लागि ३० वर्ष पुगिसकेपछि नै विस्तारै एन्टी एजिङ ट्रिटमेन्ट प्रविधिको प्रयोग गर्नुपर्छ । यद्यपि छालाको स्याहारका लागि स्वस्थ जीवनशैली र व्यायाम पनि उतिकै महत्वपूर्ण छ ।
चायाँ, पोतो तथा डन्डीफोरको समस्या
महिलाहरुमा गर्भवती भएपछि चायाँ,पोतो, डन्डीफोरजस्ता समस्या आउन सक्छ । कतिपयमा डेलिभरी पश्चात् उक्त समस्या हराउँदै गएपनि कतिपयमा भने रहिनै रहन्छ । घामको विकिरणका कारण पनि यस्तो समस्या आउन सकछ भने कतिपयमा शरीरको आन्तरिक समस्या कारण पनि यस्तो समस्या आउन सक्छ । जथाभाबी रुपमा कस्मेटिकहरुको प्रयोग छालामा हुँदा पनि यस्तो समस्या आउन सक्छ । यद्यपि कतिपयमा वंशाणुगत कारणले पनि यो समस्या आउँछ । चिल्लो छाला,तनावपूर्ण जीवनशैली जस्ता कारणले पनि कसैमा डन्डीफोर धेरै आउने समस्या हुन्छ ।
जाडोयाम र छालाको समस्या
चिसोमा हाम्रो छाला धेरै सुख्खा हुने गर्छ । यो समयमा बढी मात्रामा तातो पानीको प्रयोग गरिन्छ। तातोपानीको बढी प्रयोगले छालालाई अझै बढी सुख्खा बनाउँछ । त्यसकारण राम्रोसँग मोस्चराइजरको प्रयोग, नरिवलको तेलको प्रयोग, भित्रि लुगा सुतीको लगाउने, पर्याप्त मात्रामा पानीको खाने गर्नुपर्छ । जाडोमा छालामा सोरासिस्, हातगोडा सुन्निने, एलर्जी, विन्टर एक्जीमा, चायाँ जस्ता समस्या बढी देखिन्छ । यी सबै समस्याहरुलाई कम गर्नका लागि राम्रो मोस्चराइजर, तेल तथा अनिवार्य रुपमा सन क्रिमको प्रयोग गर्नुपर्छ ।
छालाको स्याहारका लागि छुट्याउन नहुने काम
छाला मानव शरीरको अभिन्न अंग हो । मानिसको परिचय नै अनुहार भएकोले अन्य अंगको तुलनामा अनुहारको छालामा विशेष ध्यान जाने गर्छ ।स्वस्थ छाला भनेकै चमक भएको छाला हो । त्यसकारण उमेर अनुसार तथा छाला रोग विशेषज्ञको सल्लाहमा अनुहारमा क्रिमको प्रयोग गर्न सकिन्छ। जुनसुकै मौसममा पनि सनब्लक क्रिमको प्रयोग गर्नुपर्ने हुन्छ । त्यसका साथै सन्तुलित भोजन,सागपात,फलफूल लगायतको प्रयोग छालाका लागि राम्रो मानिन्छ । यसका साथै स्वस्थ जीवनशैलीको पनि महत्वपूर्ण हुन्छ ।
