सर्वसाधारण नागरिकको पहुँचमा सुलभ, गुणस्तरीय र भरोसायोग्य स्वास्थ्य सेवा उपलब्ध गराउने उद्देश्यसहित बिर्तामोडमा ‘नागरिक अस्पताल’ सञ्चालनमा आउने भएको छ ।
आगामी वैशाखदेखि सेवा सुरु गर्ने तयारीसहित अस्पताल सञ्चालक नागरिक स्वास्थ्य सहकारी संस्था लिमिटेडले आफ्नो ५ औँ वार्षिक साधारणसभा सम्पन्न गरेको छ ।
सुविधा सम्पन्न अस्पतालहरूको केन्द्र बन्दै गएको झापाको बिर्तामोड-४ हर्कलाल रोडमा निर्माणाधीन नागरिक अस्पताल सहकारी मोडलमा सञ्चालन हुन लागेको हो । आम नागरिकलाई लक्षित गरी न्यून शुल्कमा उपचार सेवा प्रदान गर्ने लक्ष्यसहित अस्पताल स्थापना गरिएको संस्थाका कार्यकारी प्रमुख कृष्ण पौडेलले जानकारी दिए ।
शनिबार संस्थाको कार्यालयमा आयोजित साधारणसभामा अस्पताल सञ्चालनको तयारी तीव्र पारिएको जानकारी दिएको हो । अस्पताल सञ्चालनका लागि ११ कठ्ठा जमिन २५ वर्षका लागि भाडामा लिइएको र सो स्थानमा अस्पताल भवन निर्माण कार्य तीव्र गतिमा अघि बढिरहेको पौडेलले बताए । उनका अनुसार हालसम्म भवन निर्माणको करिब ९० प्रतिशत काम सम्पन्न भइसकेको छ ।
साधारणसभामा प्रस्तुत विवरणअनुसार हालसम्म नागरिक स्वास्थ्य सहकारी संस्थामा ३०० भन्दा बढी सेयर सदस्य आबद्ध भइसकेका छन् । सहकारीको सहभागितामूलक मोडलमार्फत अस्पताल सञ्चालन गर्दा सेवाग्राहीलाई सस्तो दरमा उपचार उपलब्ध गराउन सहज हुने विश्वास लिइएको छ ।
संस्थाका सदस्य कृष्ण बजगाईंले नागरिक अस्पतालले बिरामीको आर्थिक अवस्थालाई विशेष ध्यानमा राखी सुलभ दरमा उपचार सेवा दिने बताए ।
अस्पतालमा विशेषज्ञ चिकित्सकको सेवा उपलब्ध गराइने र नेपाल सरकारद्वारा सञ्चालित स्वास्थ्य बीमा कार्यक्रमसमेत लागू गर्ने तयारी रहेको संस्थाका कोषाध्यक्ष जीवन खड्काले जानकारी दिए ।
संस्थाका अध्यक्ष युवराज दाहालको अध्यक्षतामा भएको साधारणसभामा मोरङ सहकारी अस्पतालका कार्यकारी प्रमुख विकास अधिकारी प्रमुख अतिथि रहेका थिए ।
संस्थाका प्रमुख सल्लाहकार राजकुमार पोखरेल, संस्थापक अध्यक्ष बलराम कार्की, स्वास्थ्य मन्त्रालयका पूर्व सचिव डा.टंक बाह्रकोटी, पूर्व सह-सचिव डा.मुक्ति खनाल लगायतले अस्पताल सञ्चालनले क्षेत्रीय स्वास्थ्य सेवामा सकारात्मक योगदान पुग्ने विश्वास व्यक्त गर्दै शुभकामना दिएका थिए ।
कोषाध्यक्ष जीवन खड्काले स्वागत गरेको कार्यक्रमको सञ्चालन संस्थाका सचिव रवीन्द्र भट्टराईले गरेका थिए ।
