महेन्द्र रत्न मावि अनारमनीको भूतपूर्व विद्यार्थी समाजको अध्यक्षमा मदन गोपाल सुब्बा सर्वसम्मत चयन भएका छन् ।
समाजको आज सम्पन्न तेस्रो साधारण सभा तथा दोस्रो अधिवेशनबाट सुब्बाको अध्यक्षतामा नयाँ कार्यसमिति चयन भएको हो ।
आगामी दुई वर्षको लागि चयन भएको १५ सदस्यीय नयाँ समितिमा उपाध्यक्ष रुपक थापा, सचिव भूविक्रम बस्नेत र कोषाध्यक्ष नरेश न्यौपाने रहेका छन् ।
त्यस्तै सदस्यहरुमा भावना आचार्य, शारदा न्यौपाने, इन्दिरा भट्टराई, शान्ता चुडाल, शोभा आचार्य, कमलराज बिमली, सुशिल बस्नेत, बाबुलाल अग्रवाल, कृष्णलाल राजवंशी, गोपाल दाहाल र किशोर मैनाली रहेका छन् ।
समाजका संस्थापक अध्यक्ष राजकुमार पोखरेलको अध्यक्षतामा भएको कार्यक्रमको प्रमुख अतिथि विद्यालय व्यवस्थापन समितिका अध्यक्ष हरिचरण शिवाकोटी रहेका थिए ।
अध्यक्षको प्रतिवेदन संस्थापक अध्यक्ष पोखरेलले प्रस्तुत गरेको कार्यक्रममा चार जना शिक्षकलाई सम्मान गरिएको थियो । सम्मानित हुनेहरुमा प्रधानाध्यापक खड्गप्रसाद खरेल तथा शिक्षकहरु नेत्रप्रसाद खरेल, भोजराज दाहाल र युवराज कट्टेल रहेका छन् ।
कार्यक्रममा प्रमुख अतिथि शिवाकोटी, पूर्व प्रधानाध्यापक देवेन्द्र गौतम र प्रधानाध्यापक खड्गप्रसाद खरेलले शुभकामना मन्तव्य राखेका थिए ।
सोही अवसरका बीच समाजद्वारा प्रकाशित महेन्द्र रत्न प्रेरणा पुञ्ज स्मारिका विमोचन गरिएको थियो । समाजको हालसम्म १७ लाख रुपैयाँ अक्षय कोषमा जम्मा भएको र एक सय ५१ जना पूर्व विद्यार्थी आजीवन सदस्य रहेको काजी बुढाथोकीले बताए ।
उपाध्यक्ष मदन गोपाल सुब्बाले स्वागत गरेको कार्यक्रमको सञ्चालन मोहन शिवाकोटीले गरेका थिए ।
