झापाको बिर्तामोड-२ रामचोकस्थित मोहनमाया माध्यमिक विद्यालयले आफ्नो ५८ औँ वार्षिकोत्सव विभिन्न शैक्षिक, सांस्कृतिक तथा छात्रवृत्ति वितरण कार्यक्रमसहित सोमबार सम्पन्न गरेको छ ।
विद्यालय व्यवस्थापन समिति अध्यक्ष देवी निरौलाको अध्यक्षतामा आयोजित कार्यक्रमको प्रमुख अतिथि प्रतिनिधिसभा सदस्य हर्कमाया विश्वकर्मा रहेकी थिइन् ।
मोहनमाया स्काउट दलले प्रस्तुत गरेको सलामी परेड प्रदर्शनले सहभागीहरूलाई विशेष अनुभूति गराएको थियो । कार्यक्रममा विद्यालयका प्रधानाध्यापक शेरबहादुर श्रेष्ठले विद्यालयको ऐतिहासिक पृष्ठभूमि र पछिल्लो एक वर्षभित्रका गतिविधि समेटिएको प्रतिवेदन प्रस्तुत गरे । उनले मोहनमाया माध्यमिक विद्यालय कोशी प्रदेशमै २ हजारभन्दा बढी विद्यार्थी संख्या, उत्कृष्ट नतिजा र व्यवस्थापकीय क्षमताका आधारमा अग्रणी विद्यालय भए पनि स्थानीय तहबाट अपेक्षित प्रोत्साहन नपाएको गुनासो व्यक्त गरेका थिए ।
वार्षिकोत्सवका अवसरमा विभिन्न नेपाली सांस्कृतिक तथा आधुनिक नृत्य, फेसन शो र अभिनय प्रस्तुत गरिएको थियो भने उत्कृष्ट शैक्षिक नतिजा ल्याउने विद्यार्थीहरूलाई सम्मान गरिएको छ । शैक्षिक सत्र २०८१ मा कक्षा ८ मा ४ जिपिए ल्याउने ६ जना विद्यार्थीलाई सम्मान गरिएको छ ।
त्यसैगरी मोहनमाया विद्या पदकबाट कक्षा १० का ५७ जना र कक्षा १२ का ३८ जना विद्यार्थी सम्मानित भएका छन् । डीसीई छैटौँसम्म उत्कृष्ट नतिजा ल्याउने अविनय खतिवडा, सुशाना कोइराला, सन्दिप बराल, प्रजन बराल र विजु भुजेललाई पनि मोहनमाया विद्या पदक प्रदान गरिएको छ ।
कार्यक्रममा विद्यालयमा स्थापना गरिएका विभिन्न अक्षयकोषमार्फत विद्यार्थीहरूलाई पुरस्कार प्रदान गरिएको थियो। सुश्री सावित्री बस्नेत अक्षयकोष, गंगादेवी-रंगलाल चिमरिया स्मृति अक्षयकोष, नैनानन्द-विष्णुमाया संग्रौला स्मृति कोष, श्यामलाल (गंगाराम)-रणमाया खनाल स्मृति अक्षयकोष, चन्द्र-विष्णु राउत स्मृति प्रतिष्ठान, गोपालकुमार-रमा बस्नेत अक्षयकोष, स्व। सुजता रिमाल स्मृति कोष तथा रुपनारायण-पवित्रा तिवारी स्मृति कोषबाट विभिन्न कक्षामा उत्कृष्ट प्रदर्शन गर्ने विद्यार्थीहरू पुरस्कृत भएका छन् ।
सोही अवसरमा पूर्व शिक्षक राजेन्द्रप्रसाद संग्रौलाले कक्षा ५ का उत्कृष्ट विद्यार्थीलाई सम्मान गरे भने कार्यक्रमकै बीचमा शिक्षक वेदमाया खनाल र आया अम्बिका देवी दाहाललाई विदाइ गरिएको थियो ।
उक्त कार्यक्रममा बिर्तामोड नगरपालिकाका उपप्रमुख नगेन्द्र प्रसाद संग्रौला, शिक्षा शाखा प्रमुख तिलचन भण्डारीलगायतले शुभकामना मन्तव्य व्यक्त गरेका थिए ।
शिक्षक अनिता बस्नेतले स्वागत गरेको कार्यक्रमको सञ्चालन शिक्षक मुकुन्द ढकालले गरेका थिए।
