बलभद्र जनता माध्यमिक विद्यालयमा ट्राफिक जनचेतना कार्यक्रम सम्पन्न भएको छ ।
बजमावि पूर्व विद्यार्थी समाजको वार्षिक साधारणसभाबाट नवगठित कार्यसमितिको पहिलो कार्यक्रम अन्तर्गत “हाम्रो शिक्षाको आधार हाम्रै बजमाबी” भन्ने मूल नारासहित शुक्रबार विद्यालयमा ट्राफिक सचेतना कार्यक्रम आयोजना गरिएको हो ।
कार्यक्रममा ट्राफिक सचेतना तथा सडक दुर्घटना न्यूनीकरण सम्बन्धी विषयमा ट्राफिक प्रहरी इन्चार्जबाट प्रभावकारी सचेतना कक्षा सञ्चालन गरिएको पूर्व विद्यार्थी समाजका संस्थापक सदस्य एवम पूर्व सचिव रेवत दाहालले जानकारी दिए ।
संस्थाका अध्यक्ष नेत्र घिमिरेको अध्यक्षता भएको कार्यक्रममा विद्यार्थी, शिक्षक तथा पूर्व विद्यार्थी प्रतिनिधिहरूको उल्लेखनीय सहभागिता रहेको थियो ।
ट्राफिक प्रहरी इन्चार्जले सवारी दुर्घटनामा विशेषगरी युवा(युवतीहरू बढी पीडित हुने यथार्थ तथ्यहरू प्रस्तुत गर्नुका साथै हेल्मेटको प्रयोग, ट्राफिक नियमको पालना, गति नियन्त्रण र लापरवाहीले निम्त्याउने जोखिमबारे स्पष्ट जानकारी दिएका थिए ।
विद्यार्थीहरूले जिज्ञासा राख्दै सक्रिय सहभागिता जनाएको कार्यक्रमको सञ्चालन सचिव हरि घिमिरेले गरेका थिए ।
