स्व.श्यामदेव ढुंगेल स्मृति प्रतिष्ठानले झापाका चार जना अभिभावकलाई आदर्श अभिभावक सम्मान प्रदान गरेको छ ।
शिवसताक्षी नगरपालिका-६ शिवगञ्जमा अवस्थित श्री जन आदर्श माध्यमिक विद्यालय आयोजित कार्यक्रममा शिवलाल सुवेदी, धर्मप्रसाद भेटुवाल, यमबहादुर दर्जी र चन्द्रकला सापकोटालाई नगदसहित आदर्श अभिभावक सम्मान प्रदान गरिएको हो ।
विद्यालयका प्रधानाध्यापक तुलसीप्रसाद अधिकारीको अध्यक्षतामा सम्पन्न कार्यक्रममा शिवसताक्षी नगरपालिका-६ का वडाध्यक्ष मनोज कार्की प्रमुख अतिथि रहेका थिए ।
कोशी प्रदेशको सुनसरी जिल्ला सदरमुकाम इनरुवामा लामो समय बिताएका स्व.प्रजापति देव ढुंगेल र स्व.हरिमाया ढुंगेलका सुपुत्र स्व. श्यामदेव ढुंगेलको स्मृतिमा स्थापना गरिएको प्रतिष्ठानले जेष्ठ नागरिकप्रतिको सम्मानस्वरूप कार्यक्रम आयोजना गरेको जनाएको छ ।
समाजमा रहेका कर्तव्यनिष्ठ, इमानदार र जिम्मेवार अभिभावकलाई पहिचान गरी आदर्श अभिभावक सम्मान प्रदान गरिएको प्रतिष्ठानका संस्थापक संरक्षक रामप्रसाद ढुंगेलले जानकारी दिए ।
प्रतिष्ठानले हरेक वर्ष पुस ९ गते स्व.श्यामदेव ढुंगेलको जन्मदिन तथा पुण्यतिथिका अवसरमा झापा र सुनसरीका विभिन्न विद्यालयमा आदर्श अभिभावक सम्मान कार्यक्रम आयोजना गर्ने जनाएको छ ।
सम्मान कार्यक्रमका लागि झापाको शिवसताक्षी नगरपालिका-६ स्थित जन आदर्श उच्च माध्यमिक विद्यालय तथा सुनसरीको इनरुवा नगरपालिकास्थित श्री देवकोटा प्राथमिक विद्यालय र भगवती माध्यमिक विद्यालय छनोट गरिएको प्रतिष्ठानले जनाएको छ । ती विद्यालयमा स्व. श्यामदेव ढुंगेलका छोराहरू रामप्रसाद ढुंगेल, सन्जय ढुंगेल र राजु ढुंगेलले प्रारम्भिक शिक्षा हासिल गरेका कारण पहिलो चरणमा ती विद्यालयका अभिभावकलाई सम्मान गरिएको हो ।
कार्यक्रम शिवसताक्षी नगरपालिका-६ स्थित श्री जन आदर्श उच्च माध्यमिक विद्यालयमा आयोजना गरिएको थियो । विद्यालयका शिक्षक भक्तिप्रसाद काफ्लेको संयोजकत्वमा सम्पन्न कार्यक्रममा तीन अभिभावक सिफारिस समितिबाट र एक अभिभावक दाताको परिवारको सिफारिसमा चयन गरिएको जनाइएको छ।
प्रतिष्ठानका अध्यक्ष सन्जय ढुंगेलका अनुसार कार्यक्रमलाई नियमित बनाउन ढुंगेल परिवारले निश्चित रकम स्थानीय वित्तीय संस्थामा अक्षयकोषका रूपमा राख्ने र सो कोषको ब्याजबाट झापा र सुनसरीका तोकिएका विद्यालयमा बर्सेनि कार्यक्रम आयोजना गरिनेछ ।
सम्मान कार्यक्रमकै अवसरमा शिवसताक्षी नगरपालिका-६ वडा कार्यालयको आयोजनामा अभिभावक शिक्षा कार्यक्रमसमेत सञ्चालन गरिएको थियो ।
