झापाको बिर्तामोड-४ मा अवस्थित इडन गार्डेन एजुकेसन फाउन्डेसनले अन्तरविद्यालय स्तरीय प्रतिस्पर्धात्मक प्यानल डिस्कसन प्रतियोगिता सम्पन्न गरेको छ ।
विद्यालयले “नेपालको शैक्षिक सन्दर्भमा विद्यार्थीहरूका लागि एआई कार्यान्वयनका चुनौती र भावी मार्ग” विषयक प्यानल डिस्कसन प्रतियोगिताको आयोजना गरेको हो ।
प्रतियोगितामा एभरेस्ट स्मार्ट स्कुलका दिङ्माङ लिम्बु प्रथम, लिटल फ्लावर बोर्डिङ स्कुलका परिधि पाठक द्वितीय तथा तक्षशिला बोर्डिङ स्कुलका मानस ओडारी तृतीय स्थान हासिल गर्न सफल भएका छन् ।
सहभागी विद्यार्थीहरूले नेपालको शैक्षिक क्षेत्रमा एआईको प्रयोग, त्यसका सम्भावना, चुनौती तथा सही उपयोगका विषयमा आफ्नो तर्कसहित धारणा प्रस्तुत गरेका थिए ।
प्रतियोगितामा सञ्चारकर्मी तथा शिक्षक उमाकान्त खनाल, शिक्षक धर्मेन्द्र मामा भट्टराई र शिक्षक केशव उप्रेती निर्णायक मण्डलमा रहेका थिए ।
इडन गार्डेन बोर्डिङ स्कुलका संस्थापक प्रिन्सिपल मोहन आचार्यको अध्यक्षतामा तथा बिर्तामोड-४ का वडाध्यक्ष राहुल शर्माको प्रमुख आतिथ्यतामा भएको कार्यक्रममा उत्कृष्ट विद्यार्थीहरूलाई निर्णायकद्वय खनाल र भट्टराईले खादा, प्रमाणपत्र, ट्रफी तथा नगद पुरस्कार प्रदान गरी सम्मान गरेका थिए । ।
कार्यक्रमले विद्यार्थीहरूलाई आधुनिक प्रविधि र कृत्रिम बुद्धिमत्ता (एआई) को प्रयोगप्रति सचेत बनाउँदै भविष्यको शिक्षामा प्रविधिको भूमिकाबारे गहिरो बुझाइ दिन सहयोग पुगेको विद्यालयका शिक्षक तथा को-अर्डिनेटर गीताराम आचार्यले जानकारी दिए ।
संस्थापक प्रिन्सिपल मोहन आचार्यले कार्यक्रमको औचित्यमाथि प्रकाश पार्दै प्रविधिले गरेको तीव्र विकाससँगै विद्यार्थीहरूमा त्यससम्बन्धी चेतना, ज्ञान र बुझाइ कति छ भन्ने कुरा पहिचान गर्न अन्तरसंवादसहितको प्रतिस्पर्धात्मक कार्यक्रम आयोजना गरिएको बताए ।
मुस्कान बेगमले स्वागत गरेको प्यानल डिस्कसनको सहजीकरण शिक्षक खेमराज शर्माले गरेका थिए ।
