झापाको बिर्तामोड-५ मा अवस्थित न्युटन्स एजुकेशन एकेडेमीमा अध्ययनरत विद्यार्थीहरुलाई धार्मिक तथा सांस्कृतिक सम्पदाहरुको अवलोकन गराइएको छ ।
विद्यालयले आयोजना गरेको उद्धघोषण, तथा व्यक्तित्व विकास तालिममा सहभागी विद्यार्थी र टुरिजम क्लबमा आबद्ध विद्यार्थीहरुलाई शिवसताक्षी नगरपालिका-११ मा अवस्थित प्रसिद्ध धार्मिक तथा पर्यटकीयस्थल सताक्षी धामको भ्रमण गराइएको हो ।
उक्त भ्रमणमा विद्यालयमा अध्ययनरत कक्षा ६, ७, ८ र ९ का ५० जना विद्यार्थीहरुको सहभागिता रहेको थियो ।
विद्यार्थीहरुलाई आफ्नो जिल्लामा रहेका स्थानीय धार्मिक स्थलहरुको बारेमा जानकारी गराउने उद्देश्यले विद्यालयले भ्रमणको आयोजना गरेको बताइएको छ ।
पढाइको अलवा अतिरिक्त क्रियाकलापमा विद्यार्थीहरूलाई संलग्न गराउँदै धर्म, संस्कृति, पर्यटन र वातावरण संरक्षणप्रति सचेत तथा जागरुक बनाउने उद्देश्यले शैक्षिक अवलोकन भ्रमण आयोजना गरिएको विद्यालयका प्रधानाध्यापक देवेन्द्र हुमागाईंले जानकारी दिए ।
भ्रमणमा बिर्तामोड नगरका शिक्षा युवा तथा खेलकुद शाखा अधिकृत जानुका रेग्मी, बिर्तामोड नगरपालिका-२ का वडा सचिव हिमा खनाल, विद्यालय व्यवस्थापन समिति अध्यक्ष धर्मा पराजुली प्रसाई, विद्यालयका निर्देशक आशिस प्रसाईं, प्याब्सन बिर्तामोड सहकोषाध्यक्ष दिपक चम्लागाँई, शिक्षक पवित्रा पौडेलसहित सञ्चारकर्मीहरूको उपस्थिति रहेको थियो ।
उक्त अवसरमा बोल्दै बिर्तामोड नगरका शिक्षा युवा तथा खेलकुद शाखा अधिकृत जानुका रेग्मीले यस्ता कार्यक्रमले विद्यार्थीलाई स्थानीय क्षेत्रमा रहेका धार्मिक तथा पर्यटकस्थलहरुको बारेमा थाहा पाउन सहज हुने बताइन् ।
विद्यालयका निर्देशक आशिस प्रसाईंले सबैलाई धन्यवाद व्यक्त गरेको कार्यक्रमको सहजीकरण बालबालिका तथा शिक्षा सञ्चार मञ्चका संयोजक तथा शिक्षक सरोज पौडेलले गरेका थिए ।
