निजी तथा आवासीय विद्यालय संगठन प्याब्सन झापा शाखा अन्तरगत बिर्तामोड नगर समितिले आयोजना गरेको प्याब्सन स्पोट्रस मिट आइतबार सम्पन्न भएको छ ।
गत कार्तिक २८ गतेदेखि सुरु भएको स्पोट्रस मिटमा बिर्तामोड नगरभित्रका ३० वटा निजी तथा आवासीय विद्यालयले सहभागिता जनाएका थिए । प्रतियोगितामा कक्षा ९ र १० तथा कक्षा ११ र १२ स्तरीय छात्र-छात्रा भलिबल, फुटबल, कराते, क्रिकेट र सटपुट गरी पाँच वटा इभेन्ट सञ्चालन गरिएका थिए ।
प्रतियोगिता अन्तरगत सटपुट प्रतियोगितातर्फ कक्षा १० सम्मका छात्र समूहमा ग्रीनफिल्ड मा.वि विजयी भयो भने इकम मा.वि दोस्रो र फन्मिन मावि तेस्रो स्थानमा रहेको थियो ।
त्यस्तै यसै विधामा कक्षा १० सम्मका छात्रा बीचको प्रतिस्पर्धामा भने एभरेस्ट स्मार्ट मा.विले पहिलो स्थान हात पार्यो भने सरस्वती मावि दोस्रो र देवकुल मा.वि तेस्रो बनेका छन् ।
कराते काता छात्र समूह (कक्षा ९-१०) को प्रतिस्पर्धामा ग्लोरी माविले उत्कृष्ट प्रदर्शन गर्दै पहिलो स्थान हात पार्यो भने कञ्चनजङ्गा मा.वि दोस्रो र चिल्ड्रेन इन्भारोन्मेन्ट तथा कञ्चन मा.वि तेस्रो बनेका छन् ।
त्यसैगरी कराते काता छात्रा (कक्षा ९-१०) समूहमा टावर टेम्पल पहिलो, एमइटी दोस्रो तथा कञ्चनजङ्गा र सरस्वती मावि संयुक्त रूपमा तेस्रो भएको छ ।
कक्षा ८ सम्मका छात्र समूहको कराते काता प्रतियोगितामा कोहेड माविले पहिलो स्थान हासिल गर्यो भने एवाकस मावि दोस्रो र टावर टेम्पल तथा कृएटिभ मावि तेस्रो बनेको छ । छात्रातर्फ सोही कक्षा समूहमा विष्णु भगवती विद्यालय पहिलो, इकम मावि दोस्रो र कञ्चन मा.वि तथा कञ्चनजङ्गा मावि संयुक्त रूपमा तेस्रो स्थानमा रहेका थिए ।
भलिबलतर्फ कक्षा ११-१२ का छात्र समूहमा निधि माविले उपाधि हात पार्दै प्रथम भयो । इकम मावि दोस्रो र बाल्मीकि मावि तेस्रो स्थानमा रह्रयो । त्यसैगरी कक्षा १० सम्मका छात्रा भलिबल प्रतियोगितामा लिटल फ्लावर मावि विजेता घोषित भयो भने गोमेन्द्र मावि दोस्रो र टावर टेम्पल मावि तेस्रो बनेको छ ।
त्यस्तै कक्षा १० सम्मका छात्र समूहको भलिबलतर्फ कञ्चनजङ्गा माविले उपाधि जित्यो । वेल्स मोडल मावि दोस्रो र गोमेन्द्र मावि तेस्रो भएको छ । कक्षा ११-१२ छात्रा समूहको भलिबलमा निधि मावि पहिलो, गोबेन्द्र मावि दोस्रो तथा कञ्चनजङ्गा मावि तेस्रो बनेको छ ।
यसैगरी क्रिकेटमा न्युटन्स एजुकेसन फाउन्डेसन प्रथम भयो भने निधि माध्यमिक विद्यालयले दोस्रो स्थान हात पारेको छ ।
त्यस्तै फुटबलतर्फ टावर टेम्पल प्रथम, कञ्चन बोर्डिङ स्कुल दोस्रो र एभरेस्ट स्मार्ट स्कुल तेस्रो भएको छ ।
बिर्तामोड नगर प्याब्सन अध्यक्ष सुरेन्द्र खरेलको अध्यक्षतामा भएको पुरस्कार वितरण तथा समापन समारोहको प्रमुख अतिथि बिर्तामोड नगरपालिकाका शिक्षा शाखा प्रमुख तिलचन भण्डारी रहेका थिए ।
उक्त अवसरमा कार्यक्रमका प्रमुख अतिथि शिक्षा शाखा प्रमुख भण्डारी, झापा जिल्ला प्याब्सनका अध्यक्ष छत्र कार्की, बिर्तामोड नगरपालिका वडा नं.४ का अध्यक्ष राहुल शर्मा लगायतले आ-आफना धारणा राखेका थिए ।
समापन समारोहमा प्रमुख अतिथि तिलचन भण्डारी, प्याब्सन झापा अध्यक्ष छत्र कार्की, वडाध्यक्ष राहुल शर्मा तथा खेलकुद संयोजक अमृतकुमार तिम्सिना लगायतले विजेता तथा उपविजेता टिमहरूलाई मेडल, ट्रफी र प्रमाणपत्र प्रदान गरेका थिए ।
