३१ भदौ, काठमाडौं । लेखक तथा निर्देशक शंकर अधिकारी ‘घायल’ निर्देशित नयाँ नेपाली चलचित्र ‘सुस्केरा’ छायांकन सम्पन्न गरी पोस्ट–प्रोडक्सनको चरणमा प्रवेश गरेको छ ।
सत्य घटनामा आधारित यो चलचित्रले सडकमा जीवन बिताउने एक बालकको मार्मिक कथा मार्फत समाजको यथार्थ चित्रण गर्ने प्रयास गरेको छ । आफूलाई आत्मनिर्भर बनाउन नसके पनि अरूका लागि बाँच्ने एक बालकको जीवन–संघर्ष यस फिल्मको मुख्य कथावस्तु बनेको निर्देशक ‘घायल’ले जानकारी दिएका छन् ।
चलचित्रमा बालकलाकार शुभम अधिकारी, हर्दिक पौडेल र नायरा प्रसाई प्रमुख भूमिकामा देखिने छन् । साथै, शमिला शर्मा, दिनेश कोइराला, डा. ओमकृष्ण प्रसाई, उषा किरण अधिकारी, मनिषा श्रेष्ठ, सञ्जित श्रेष्ठ, कल्पना भुजेल, उमेश मगरलगायतका कलाकारहरूको पनि अभिनय रहेको छ ।
फिल्मको निर्माण डा. ओमकृष्ण प्रसाई, मोहन गमाल र मनोज अधिकारीले गरेका छन्। कुमार मानन्धरले छायांकन, मदन न्यौपानेले श्रृङ्गार र सुरेश पाण्डेले नृत्य निर्देशन गरेका छन् ।
‘सुस्केरा’ ममता रायमाझीको प्रस्तुतिमा कर्मविर मल्टिपर्पोज इन्भेष्टमेन्ट प्रालिको ब्यानरमा निर्माण भइरहेको छ ।
