पछिल्लो समय बिर्तामोड नगरपालिका मात्र नभएर देशभर सामाजिक सुरक्षा भत्ता नविकरण कार्यक्रम सञ्चालन भइरहेको छ ।
यसैबीच झापाको बिर्तामोड नगरपालिका वडा नं.२ ले नेपाल सरकारले नि:शुल्क रुपमा ज्येष्ठ नागरिकका लागि प्रदान गरेको स्वास्थ्य बिमा कार्यक्रम पनि सञ्चालन गरिरहेको छ ।
स्वास्थ्य बिमाका लागि घर-घरमा पुगेर सुविधा दिन नसकिरहेको अवस्थामा सामाजिक सुरक्षा भत्ता नविकरण गर्न आएको समयमा सम्बिधत सेवाग्राही आएको मौका पारेर स्वास्थ्यदर्ताकर्मीहरुले स्वास्थ्य बिमा गरिरहेको वडाध्यक्ष किशोरकुमार पौडेलले जानकारी दिए ।
।
वडाभित्र ६०० भन्दा बढी ज्येष्ठ नागरिक रहेकोमा यसअघि सेवा लिनुपर्छ भनेर ३० प्रतिशत नागरिक बिमा कार्यक्रममा सहभागी भइसकेको र स्वास्थ्य बिमा बञ्चित बाँकी आमाबुबाहरुलाई वडाले शिविरको माध्यमबाट समेटिरहेको वडाध्यक्ष पौडेलले बताए ।
स्वास्थ्यकर्मी बबिता घिमिरे र वडा कार्यालयका कर्मचारी अनु ढकालले ज्येष्ठ नागरिकहरुलाई सेवा प्रदान गरिरहेका वडाध्यक्ष पौडेलले जानकारी दिए ।
गत साउन १ गतेबाट सुरु भएको शिविरमा हालसम्म ८५ जनाले स्वास्थ्य बिमा गरेको उनले बताए । दुई महिनासम्म चल्ने शिविरबाट धेरै आमाबुबाहरु लाभान्वित हुनु भएको र नविकरण आउने ज्येष्ठ नागरिकहरुलाई पनि सोधीसोधी बिमा कार्यक्रममा सहभागी गराउने गरिएको वडा सचिब हिमा खनालले बताइन् ।
