‘एकता र संस्कृतिको संगालो, पीडितको जीवनमा आशाको उज्यालो’ भन्ने नारासहित झापाली समाज ओमानले राहत तथा उद्धार कोष सहयोगार्थ बृहत सांस्कृतिक कार्यक्रम २०२५ गर्ने भएको छ ।
जुलाई २५ तारिखमा प्रिन्स प्यालेस, मस्कटमा आयोजना हुने सांस्कृतिक कार्यक्रममा नेपालबाट आउने प्रख्यात गायक-गायिका महेश काफ्ले र अस्मिता अधिकारीको लाइभ प्रस्तुतिका साथै तामाङ, किरात, गुरुङ्ग, मगरलगायतको जातिय भेषभुषासहित सांस्कृतिक नृत्यहरु प्रस्तुत हुने समाजका कोषाध्यक्षले शेखर खतिवडाले जानकारी दिए ।
सन् २०२० मार्च ६ मा स्थापना भएको झापाली समाज ओमानले छोटो समयमा नै धेरै सामाजिक कार्यहरू गरिसकेको जानकारी दिदै समाजका कोषाध्यक्ष तथा कार्यक्रम संयोजक खतिवडाले सोही अभियानलाई अझै बढाउदै लैजान र देशको मौलिक संस्कृति जगेर्ना गर्नका लागि अन्तर्राष्ट्रियस्तरको सांस्कृतिक कार्यक्रम गर्न लागिएको बताए ।
झापाली समाज ओमानले गर्न लागेको पहिलो ऐतिहासिक अन्तर्राष्ट्रियस्तरको यस कार्यक्रमलाई सम्पन्न गर्न प्रचारप्रसार तिव्र बनाइएको र ओमानमा भएका अहिलेसम्मका कार्यक्रमहरुभन्दा बढी दर्शकहरुलाई जम्मा गरेर रेकर्ड ब्रेक गर्ने उद्देश्य रहेको समाजले जनाएको छ ।
उक्त कार्यक्रमबाट बचेको रकम ओमानमा रहेका नेपालीहरुको भैपरी आउने समस्या समाधानका लागि र झापामा सामाजिक कार्यका लागि खर्चिने योजना रहेको कोषाध्यक्ष खतिवडाले बताएका छन । उनले ओमानमा रहेका नेपालीहरुको समस्यामा सहयोग गर्ने संस्थाहरुमा झापालि समाज ओमान अग्रपंक्तिमा रहेको र यो कार्यलाई आगामी दिनमा पनि निरन्तरता दिइने बताए ।
