झापाको चारआलीस्थित त्रिदेव बहुमुखी क्याम्पसका विद्यार्थीहरूले अब सगरमाथा यातायातमा छुट पाउने भएका छन् ।
त्रिदेवका विद्यार्थीहरूले सगरमाथा यातायात सेवा प्रा.लि.सँगको सहकार्यमा ५० प्रतिशत छुटमा यातायात सेवा लिन सक्ने स्ववियु सभापति इश्वर रिजालले जानकारी दिए ।
स्ववियुको सक्रिय पहलमा यो सुविधा सञ्चालनमा आएको हो । काँकडभिट्टा-चारआली-बिर्तामोड रुटमा लागू हुने यस सुविधाअनुसार क्याम्पसको आधिकारिक विद्यार्थी कार्ड र क्याम्पस ड्रेस अनिवार्य गरिएको छ ।
स्ववियु निर्वाचनको घोषणापत्रमा उल्लेख गरिएको ग्यारेन्टी नम्बर १६ “यातायात व्यवसायीसंघ सहकार्य गर्दै आउनेछ, विद्यार्थी सुलभ भाडामा यातायात चढ्दै” लाई कार्यान्वयनको चरणमा रूपान्तरण गरिएको हो ।
उक्त अवसरमा क्याम्पस प्रमुख गोपीकृष्ण भट्टराईलाई निर्णय पत्र हस्तान्तरण गर्दै सगरमाथा यातायात सेवा प्रा.लि.का अध्यक्ष नवीन कोइरालाले सेवाको औपचारिक घोषणा गरेका हुन् ।
उक्त कार्यक्रममा क्याम्पस सञ्चालक समितिका अध्यक्ष हरिप्रसाद घिमिरे, सह-क्याम्पस प्रमुख तेजप्रसाद खनाल र स्ववियु पदाधिकारीहरूको उपस्थिति रहेको थियो ।
