झापाको शिवसताक्षी नगरपालिका वडा नं.८ झिलझिलेका एक किशोर २४ घण्टा लामो समयदेखि बेपत्ता भएका छन् ।
झिलझिले माध्यमिक विद्यालयमा कक्षा १० मा अध्ययनरत १६ वर्षीय प्रचिन लुइटेल शनिबार दिउँसोदेखि सम्पर्कविहीन भएका हुन् ।
परिवारका अनुसार प्रचिन आफ्नी दिदी पुष्पा लुइटेलसँग शनिवार काँकरभिट्टा गएका थिए । पुष्पाले भनिन् ‘ शनिवार भएकाले उ स्कूल गएको थिएन । भाईलाई एक्लै घरमा छोड्न भन्दा पनि आफै संग लैजान महिले उचिन ठाने । हामी दुवै जना आफन्त भेट्न काँकडभिट्टाको बर्मेली टोल गएका थियौँ । घरायसी सामान किन्न म पानीट्याङ्की जानुअघि भाइलाई ठुलो मम्मिको घरमै छोडेकी थिएँ । फर्केर आउँदा उनी घरमा थिएनन् ।’ ठूलो मम्मीको अनुसार ‘शौचालय जान्छु भनेर घर बाहिर निस्केका थिए । तर त्यसपछि उनी अहिले सम्म सम्पर्कमा आएका छैनन्,’ दिदी पुष्पाले भनिन् ।
वेपत्ता किशोरका परिवार अन्य आफन्तले चिनजानका ठाउँ र काँकरभिट्टाका गल्ली-गल्लीसम्म खोजी गरे पनि उनी फेला परेका छैनन् । स्थानीय प्रहरीको सहयोगमा सिसी क्यामेराका फुटेजसमेत हेर्यौ तर किशोरको अत्तो पत्तो नभएको खोजिमा संलग्न आफन्तले बताएका छन् ।
बेपत्ता प्रचिनको खोजीमा परिवारले सञ्चारकर्मी, प्रहरी, कानुन व्यवसायी लगायत आम नागरिकसँग सहयोगको अपिल गरेका छन् । किशोर बेखवर भएपछि आफन्तले इलाका प्रहरी कार्यालय काँकरभिट्टा र इलाका प्रहरी कार्यालय झिलझिलेसमेत लिखित उजुरी दिएको बताएका छन् ।
जिल्ला प्रहरी कार्यालय झापाले पनि किशोर बेपत्ता भएको पुष्टि गरेको छ । प्रहरी नायब उपरीक्षक (डीएसपी) खगेन्द्रबहादुर खड्काले भने, ‘हामीले खबर प्राप्त गरेपछि मातहतका सम्पूर्ण प्रहरी इकाइलाई सूचना पठाएका छौं । यतिबेला खोजी कार्य तीव्र पारिएको छ ।’
आफन्तले पनि कुनै कारणले बेखवर भएको भए प्रचिनलाई घर फर्कन अनुरोध गरेका छन् । किशोरकी आमाको कारोना संक्रमण भएर मृत्यु भएको थियो । बाबु बैदेशिक रोजगारमा छन् । उनि दिदी पुष्पासँग बस्दै आएका थिए ।
