झापाको झापा गाउँपालिकाले सामुदायिक विद्यालयमा अध्यनरत ३९५ जना विद्यार्थीलाई छात्रवृत्ति प्रदान गरेको छ ।
पालिकाको सभहलमा आयोजना गरिएको छात्रवृत्ति वितरण कार्यक्रममा डिल्लीराज मावि, जनकल्याण मावि र जनता माविमा कक्षा ११ र १२ मा अध्यनरत ३९५ छात्रछात्रालाई करिब ४३ लाख बराबरको छात्रवृत्ति प्रदान गरिएको शिक्षा समिति अध्यक्ष एवं कार्यवाहक अध्यक्ष अन्जुदेवी थपलियाले जानकारी दिइन् ।
झापा गाउँपालिका भित्रका सामुदायिक विद्यालयमा अध्यन गर्ने विद्यार्थीलाई उच्च शिक्षाबाट बन्चित हुनु नपरोस भन्ने निर्वाचित पालिका अध्यक्ष जयनारायण शाहले अगाडि बढाएको नीति तथा कार्यक्रम अनुसार छात्रवृत्ति, साइकल वितरण जस्ता महत्त्वपूर्ण कार्यक्रमलाई निरंतरता दिदै अगाडि बढेको थपलियाको भनाई छ ।
झापा गाउँपालिक भित्र ११/१२ सञ्चालित ३ वटा विद्यालयका विद्यार्थीलाई छात्रवृत्ति प्रदान गरिएको प्रमुख प्रशासकीय अधिकृत गजेन्द्र थपलियाले बताए । थपलियाका अनुसार कक्षा ११ मा अध्यनरन विद्यार्थीले जनही ९ हजार २ सय ५० रुपैयाँ, कक्षा १२ मा अध्यनरत विद्यार्थीले जनही ११ हजार २ सय रुपैयाँ र प्राविधिक धार (बाली बिज्ञान)मा ११/१२ मा अध्यनरत विद्यार्थीलाई जनही १२ हजार रुपैयाँको दरले छात्रवृत्ति प्रदान गरिएको छ ।
शिक्षा शाखा प्रमुख जीवन ढकालले दिएको जानकारी अनुसार शुक्रबार छात्रवृत्ति प्रदान डिल्ली राज माविका ५७ जना कक्षा ११ र १३६ जना कक्षा १२ का विद्यार्थी रहेका थिए ।
त्यसैगरी जनता माविका प्राविधिक धारतर्फ कक्षा ११ का १० र कक्षा १२ का ९ विद्यार्थी थिए भने साधारण तर्फ कक्षा ११ का ४५ विद्यार्थी र कक्षा १२ का १०६ विद्यार्थी रहेका थिए ।
त्यस्तै ढकालका अनुसार जनकल्याण माविमा अध्यनरत कक्षा १२ का ३२ विद्यार्थीलाई समेत पालिकाले नीति तथा कार्यक्रम मार्फत छुट्टाएको रकमबाट छात्रवृत्ति प्रदान गरिएको हो ।
छात्रवृत्ति प्रदान कार्यक्रममा वडाध्यक्ष राजकुमार यादव, शखी चन्द्र ठाकुर, गाउँ शिक्षा समिति सदस्य सुन्दरलाल गणेश, नेपाल शिक्षक महासंघ झापा गाउँपालिका अध्यक्ष जगन्नाथ राजवन्सी, सचिव टीकाप्रसाद कट्टेल लगायतले शुभकामना मन्तव्य राखेको कार्यक्रममा विभिन्न वडाका वडाध्यक्ष, जनप्रतिनिधि, शिक्षक, अभिभावक र विद्यार्थीको बाक्लो उपस्थित रहेको थियो ।
