राष्ट्रिय स्वतन्त्र पार्टी (रास्वपाका) सभापति रवि लामिछाने पक्राउ परेका छन् ।
काठमाडौँको हात्तिगौडास्थित निवासबाटै शुक्रबार राति प्रहरीले लामिछानेलाई पक्राउ गरेको हो ।
उनलाई उपत्यका अपराध अनुसन्धान कार्यालयको टोलीले पक्राउ गरेको हो । नेपाल प्रहरीका केन्द्रीय प्रवक्ता दिनेशकुमार आचार्यका अनुसार लामिछानेलाई प्रक्रियागत रूपमा अदालत बुझाउने छ । ‘अदालतको फैसलाबमोजिम उहाँ (रवि लामिछाने)लाई पक्राउ गरेका छौं । रुपन्देहीको मुद्दा भएकाले त्यहाँको अदालतमा उपस्थित गराउनेगरी भैरहवा लैजान्छौं,’ उनले भने ।
उच्च अदालत तुलसीपुरको बुटवल इजलासले जिल्ला अदालत रुपन्देहीको फैसलालाई उल्टाउँदै थुनामा पठाउने आदेश दिएपछि उनी पक्राउ परेका हुन् । पक्राउ पर्नुअघि सभापति लामिछानेले आफू गिरफ्तारी दिन तयार रहेको बताएका थिए ।
पक्राउ गर्नुअघि किन भयो विवाद?
सभापति लामिछानेलाई समात्न पौने ९ बजे प्रहरीको केन्द्रीय अनुसन्धान ब्यूरो (सीआईबी), उपत्यका अपराध अनुसन्धान कार्यालय र जिल्ला प्रहरी परिसर, काठमाडौँको संयुक्त टोली हात्तीगौंडास्थित सिजी हिल्समा रहेको लामिछाने निवास पुगेको थियो ।
प्रहरी टोली पुग्दा लामिछाने आफ्नो कोठामा बसिरहेका थिए । उनलाई थुनामा पठाउने आदेश आएको थाहा पाएलगत्तै रास्वपाका नेता कार्यकर्ता पनि त्यहाँ पुगिसकेका थिए । लगत्तै उपत्यका अपराध अनुसन्धान कार्यालयका एसपी मनोहर भट्ट, डीएसपी अनिल घिमिरे लगायतले लामिछानेलाई अदालतको आदेश कार्यान्वयनका लागि भन्दै आफूहरूसँगै जान भनेका थिए ।
तर, उनले औपचारिक कागजात माग्न खोजे । प्रहरी त्यसबेला उच्च अदालत बुटवल इजलासले दिएको आदेशको प्रतिलिपि मात्र बोकेर त्यहाँ पुगेका थिए । प्रहरी अधिकारीहरुले त्यही प्रतिलिपिमा हस्ताक्षर गरेर लामिछानेलाई हिंड्न भनेका थिए । तर, रास्वपा नेताहरु र लामिछानेले पक्राउ पूर्जी दिनुपर्ने भन्दै अडान लिए ।
लामिछानेको कोठामा रहेका अन्य रास्वपा नेता तथा सहयोगीहरुले प्रहरीलाई ‘तयारी गरेर आउनु पर्दैन ?’ भन्दै प्रश्न गर्न थाले । त्यसपछि केही बेर प्रहरी र लामिछानेबीच सवाल जवाफ समेत भयो ।
लामिछानेले आफ्नो हकमा प्रहरीलाई कुनै तयारी गर्नु नपर्ने भन्दै कटाक्ष गरे, ‘…मलाई आउने लाने, थुन्ने हो… । दुई तिहाइको सरकार हो ।’
वादविवाद हुन थालेपछि प्रहरीले जरुरी पक्राउ पूर्जीको पाना मगायो । प्रहरीले त्यहीँ जरुरी पक्राउ पूर्जी तयार गर्न थालेपछि एक जना नेताले ‘गृहमन्त्री जस्तो पदमा बसेको पार्टीको सभापति भएको पदमा भएकालाई यहाँ बसेर पत्र बसेर दिने हो ?’ भन्दै प्रश्न गरे । लामिछाने पनि केही बेखुश सुनिँदै प्रहरीलाई ‘लेख्नुस्, लेख्नुस्’ भन्न थालेका थिए ।
पक्राउ पूर्जी तयार हुँदा साढे ९ भइसकेको थियो । त्यसमा हस्ताक्षर गरेर लामिछाने प्रहरीसँग निस्किन राजी भए । यसपछि प्रहरी टोलीले लामिछानेलाई बा २१ च २१०७ को गाडीमा राखेर प्रहरीले भद्रकाली पुर्याएको छ ।
