त्रिभुवन विश्वविद्यालयका त्रिविका १८ वटा आङ्गिक क्याम्पसमा भोेलिसम्म निर्वाचन गर्न नसके दुई वर्षका लागि स्वतन्त्र विद्यार्थी युनियन खारेज हुने भएको छ ।
भोलिसम्म निर्वाचन गर्न नसकेमा ती क्याम्पसमा अर्को पटक अर्थात् दुई वर्षपछि मात्रै निर्वाचन हुने छ । किनकि त्रिविको स्ववियु निर्वाचनसम्बन्धी निर्देशिका २०८१ ले पहिलो पटक तोकिएको मितिमा निर्वाचन हुन नसकेको १५ दिनभित्रमा निर्वाचन सम्पन्न गर्नै पर्ने व्यवस्था गरेको छ ।
त्रिविले पहिलो पटक चैत ५ गतेका लागि स्ववियु निर्वाचनको मिति तोकेको थियो । नयाँ व्यवस्था अनुसार अब बाँकी रहेका क्याम्पसमा भोलिसम्म निर्वाचन गर्नैपर्नेछ । यसअघि पहिलो पटक तोकिएको मितिमा निर्वाचन सम्पन्न गराउन नसकेमा ३० दिनभित्र गर्न सकिने व्यवस्था थियो । पुरानो उक्त व्यवस्थालाई संशोधन गरेर २०८१ को निर्देशिकाले नयाँ व्यवस्था गरेको हो ।
४४ वटा आङ्गिक क्याम्पसमा निर्वाचन सम्पन्न भइसकेको छ । आङ्गिकमध्येकै चर्चित क्याम्पसमा पर्ने रत्नराज्यलक्ष्मी, नेपाल ल, विश्वभाषा, सरस्वती, पाटन संयुक्तसहित १७ क्याम्पसमा स्ववियुको निर्वाचन हुन सकेको छैन भने त्रिचन्द्रमा आज निर्वाचन भइरहेको छ ।
