आगामी नयाँ शैक्षिक सत्र २०८२ को लागि चाहिने आवश्यक सबै नयाँ पाठ्यपुस्तक छपाईको काम सकिएको छ ।
सरकारको स्वामित्वमा भएको जनक शिक्षा सामग्री केन्द्र लिमिटेडले सबै पुस्तक छपाईको काम सकिएको जनाएको हो ।
जनक शिक्षा सामग्री केन्द्र लिमिटेडका प्राविधिक निर्देशनालयका उपनिर्देशक तिलबहादुर अधिकारीका अनुसार नयाँ शैक्षिक सत्रलाई चाहिने १ करोड ७० लाख थान नयाँ पुस्तक छाप्नुपर्ने अनुमति जनक शिक्षाले पाएको थियो । यी सबै पुस्तक छपाईको काम सकिएको उनले जानकारी दिए ।
उनले गत फागुन १९ गते नै १ करोड ५५ लाख थान पुस्तक छपाई सकिसकेको र बाँकी १५ लाख थान छपाइ फागुन भित्र नै छपाई सकाउने गरि जनक शिक्षा अघि बढेको जानकारी दिएका थिए । त्यहीअनुसार जनक शिक्षाले यस वर्ष पनि समयमै पुस्तक छपाई सकेको छ । जनक शिक्षाले २०८० सालको शैक्षिक सत्रका लागि १ करोड ५० लाख थान नयाँ पुस्तक छाप्नुपर्ने अनुमति पाएको थियो ।
यस्तै कक्षा ५ देखि १२ सम्मको पाठ्यपुस्तक छपाईको जिम्मेवारी पाएको जनक शिक्षाले गत वर्ष (२०८१) का लागि १ करोड ७४ लाख थान छाप्ने अनुमति पाएको थियो । छापिएका ती नयाँ पुस्तक चैत १५ गतेदेखि बिक्री वितरणको काम थालेको थियो । यस वर्ष पनि समयमै पुस्तक वितरण थाल्ने जनक शिक्षाको योजना छ ।
