यो वर्षको माध्यमिक शिक्षा परीक्षा(एसईई) को उत्तर पुस्तिका प्रदेशमै परीक्षण गरिने भएको छ ।
कोशी प्रदेश सामाजिक विकास मन्त्रालयले बुधबार विराटनगरमा पत्रकार सम्मेलन गरी यो वर्ष देखि एसइइ परीक्षाको उत्तर पुस्तिका प्रदेश स्तरमै परीक्षण गरिने जानकारी दिएको हो ।
पत्रकार सम्मेलनमा कोशी प्रदेश शिक्षा विकास निर्देशनालय धनकुटाका निर्देशक कृष्णप्रसाद पोखरेलले परीक्षा गराउनेदेखि उत्तर पुस्तिकासमेत प्रदेशमै जाँच्ने व्यवस्था गरिएको जानकारी दिए ।
प्रदेश स्तरमा नतिजा प्रकाशित गर्नका लागि आवश्यक प्राविधिक जनशक्ति र स्रोत साधन नभएका कारण रिजल्ट निकाल्ने काम परीक्षा नियन्त्रण कार्यालय सानो ठिमीले नै गर्ने पोखरेलले बताए ।
उनले एसईईको परीक्षामा केन्द्रध्यक्ष नियुक्तिमा विवाद र चलखेल हुँदै आएकोमा यो वर्षदेखि विवाद पनि नहुने निर्देशनालयले दाबी गरेको छ । पोखरेलले यो वर्ष देखि परीक्षा केन्द्र तोकिएको विद्यालयकै प्रधानाध्यापक केन्द्राध्यक्ष हुने र सहायक केन्द्राध्यक्ष र अन्य कर्मचारी नियुक्त गर्ने खटाउने व्यवस्था गरिएकाले विवाद आउने अवस्था नहुने स्पष्ट पारेका थिए ।
कोशी प्रदेशमा ३ सय ७१ परीक्षा केन्द्र तोकिएको छ । केन्द्राध्यक्ष, सहायक केन्द्राध्यक्ष, निरीक्षक, परीक्षा सहायक, सहयोगी र सुरक्षाकर्मी गरी १२ हजार ९ सय ४९ जना कर्मचारी खटाइने जनाइएको छ ।
कोशी प्रदेशमा यो वर्षको एसईईमा ८० हजार ९ सय ३४ जना विद्यार्थी सहभागी हुँदै छन् । यो वर्षको एसईई परीक्षा चैत ७ गते देखि १९ गते सम्म सञ्चालन हुँदैछ ।
