झापाको चन्द्रगढीस्थित वीरेन्द्र माध्यमिक विद्यालयले ५९ औं वार्षिक उत्सव तथा अभिभावक दिवस भव्यताका साथ सम्पन्न गरेको छ ।
विद्यालय व्यवस्थापन समितिका अध्यक्ष असारु राजवंशीको अध्यक्षतामा भएको कार्यक्रमको उद्घाटन भद्रपुर नगरपालिकाका प्रमुख गणेश पोखरेलले गरेका थिए ।
उत्कृष्ट शिक्षकसहित छात्राछात्रलाई पुरस्कार प्रदान गरिएको कार्यक्रमको उद्घाटन गर्दै पोखरेलले नगरपालिकाले पर्याप्त बजेट नभए पनि शिक्षा क्षेत्रलाई पहिलो प्राथमिकमा राखेको बताउँदै विद्यालयलाई सहयोग गर्ने प्रतिबद्धता जनाएका थिए ।
प्रधानाध्यापक खिलाराज कोइरालाले विद्यालयको वार्षिक प्रतिवेदन प्रस्तुत गर्दै विद्यालयको आर्थिक, भौतिक लगायतका विषयलाई उजागर गर्दै समस्या र चुनौतीका बारेमा प्रकाश पारेका थिए ।
उक्त अवसरमा उत्कृष्ट शिक्षिका मन्जु चौधरीलाई नगदसहित प्रशंसापत्र प्रदान गरेर सम्मान गरिएको थियो भने कार्यक्रममा कक्षा ८, ९ र १० मा अध्ययनरत उत्कृष्ट १२ जना छात्रछात्रालाई विभिन्न कोषबाट प्राप्त रकमबाट पुरस्कार प्रदान गरिएको थियो ।
यसैगरी खेलकुद लगायतका विभिन्न प्रतियोगितामा उत्कृष्ट हुने पाँच दर्जन बढी विद्यार्थीलाई प्रशंसापत्रसहित सम्मान गरिएको थियो ।
उत्कृष्ट छात्र छात्रालाई धर्मप्रसाद घमचन्द्र स्मृति छात्रवृत्ति, स्व.डिल्लीप्रसाद भट्टराई स्मृति कोष छात्रवृत्ति, स्व. विधानाथ पवित्रादेवी तिम्सिना अक्षयकोष र केशर जमुना स्मृति छात्रावृत्ति पुरस्कारबाट छात्रवृत्ति वितरण गरिएको प्रधानाध्यापक कोइरालाले बताए ।
शिक्षक मन्जु दाहालले मन्तव्यबाट स्वागत गरेको कार्यक्रमको सञ्चालन शिक्षक गिरीधर शर्मा कट्टेलले गरेका थिए ।
