झापाको बिर्तामोड-३ मा अवस्थित महेन्द्र रत्न माध्यमिक विद्यालयका भूतपूर्व विद्यार्थी डा.लक्ष्मीप्रसाद मैनालीले आफूले अध्ययन गरेको विद्यालयका जेहेन्दार विद्यार्थीलाई वर्षेनि प्रदान गर्ने गरी पुरस्कारको स्थापना गरेका छन् ।
डा.मैनाली भूतपूर्व विद्यार्थी समाज महेन्द्र रत्न माविका संस्थापक सदस्य हुन् । आफ्ना दिवंगत हजुरबुवा रामप्रसाद मैनाली (गाउँबुढा), हजुरआमा विशेश्वरा मैनाली र बुवा खेमप्रसाद मैनालीको स्मृतिमा राम-विशेश्वरा-खेम स्मृति पुरस्कार स्थापना गरेका हुन् ।
पहिलो वर्ष सो पुरस्कार कक्षा ८ को वार्षिक परीक्षामा गणित, विज्ञान र नेपाली विषयमा उत्कृष्ट तीनजना विद्यार्थीहरुलाई जनही ५ हजार रुपैयाँका दरले प्रदान पनि गरिएको छ ।
आइतवार एक कार्यक्रमका बीच डा.मैनाली, उनकी श्रीमती प्राध्यापक सुमा सेढाई, दिदी विष्णु संग्रौलाको उपस्थितिमा भूतपूर्व विद्यार्थी समाजका अध्यक्ष राजकुमार पोखरेल र विद्यालयका प्रधानाध्यापक खड्गप्रसाद खरेलले विद्यार्थीहरुलाई पुरस्कार प्रदान गरेका हुन् ।
उक्त अवसरमा भूतपूर्व विद्यार्थी समाजका उपाध्यक्ष मदनगोपाल सुब्बा, महासचिव मोहन शिवाकोटी तथा सदस्यहरु, विद्यालयका शिक्षक, कर्मचारी र विद्यार्थीहरुको उपस्थिति थियो ।
संस्थापक डा.मैनालीले स्वागत मन्तव्यसहित औचित्य माथि प्रकाश पारेको कार्यक्रमको सञ्चालन प्रधानाध्यापक खरेलले गरेका थिए ।
