झापाको बिर्तामोड-४ स्थित गोमेन्द्र बिर्ता मोडल इङ्लिस स्कुलले उत्कृष्ट शिक्षक, अभिभावक तथा विद्यार्थीलाई सम्मान गरेको छ ।
विद्यालयको सोमबार सम्पन्न २८ औं वार्षिकोत्सवको अवसरमा उनीहरूलाई सम्मान गरिएको हो ।
बिर्तामोडको सिटी सेन्टरमा आयोजित एक भव्य कार्यक्रमका बीच विद्यालयले शिक्षक सीएम खनाललाई दीर्घ सेवा सम्मानद्वारा सम्मानित गरेको छ । खनाल एक दशक बढी समयदेखि गोमेन्द्र बिर्ता मोडलमा अध्यापन छन् ।
अभिभावकहरू गीता रिजाल दाहाल, भोला गुरागाईं, उदयनारायण दाहाल, ध्रुवकुमार पुरी, कुमार पन्त र अरुण लिङ्खिम राईलाई सम्मान गरिएको छ । विद्यालयका जन्मदाता ज्ञानुनाथ मैनाली र कुशलादेवि शिवाकोटीलाई जयनारायण-हरिप्रिया स्मृति पुरस्कार प्रदान गरिएको थियो ।
त्यस्तै ७ हजार ५ सय नगद राशीको धनमाया शर्मा स्मृति पुरस्कार मेधावी छात्रा निर्जला राई, ५ हजार पाँच रुपैया राशीको दाधरा पुरस्कार छात्रा शिवानी नेसालाई प्रदान गरिएको थियो भने नेसालाई नगद तथा सम्मानपत्रका साथै स्कूल ब्याग र शैक्षिक सामाग्री समेत प्रदान गरिएको थियो ।
नगद पाँच हजार पाँच रुपैयाको देवका ढकाल स्मृति छात्रवृत्ति पुरस्कार विद्यार्थीहरु अनिशा राजवंशी र दिपस्ना लिम्बू (संयुक्त), आरभराज डाँगी, सगुन श्रेष्ठ र प्रज्वल प्रसाईलाई प्रदान गरिएको छ ।
सरसफाईमा उत्कृष्ट छात्राहरु कृति थापा र श्रेया राईलाई पुरस्कृत गरियो भने ग्रेसा दियालीलाई अनुशासित विद्यार्थीको रुपमा पुरस्कृत गरिएको कार्यक्रम सञ्चालक तथा विद्यालयका इन्चार्ज तीर्थ दाहालले जानकारी दिए ।
वर्षोत्कृष्ट विद्यार्थीको रुपमा एलेक्स पोखरेल र मस्ट भर्सटायल विद्यार्थीको रुपमा सायन घोष पुरस्कृत भए । उनीहरूलाई विद्यालयका निर्देशक तथा कार्यक्रमका अध्यक्ष उत्तम खनाल, सहनिर्देशक गीता ढकाल खनाल र संस्थापक प्राचार्य गणेशप्रसाद खनालले सम्मान पत्र प्रदान गरेका थिए ।
शिक्षक तथा विद्यार्थीहरुले विभिन्न साँङ्गीतिक तथा सास्कृतिक प्रस्तुति राखेको कार्यक्रममा प्याब्सन बिर्तामोडका अध्यक्ष सुरेन्द्र खरेल, कोषाध्यक्ष प्रमिला बजगाईं, सदस्य दिपक चम्लागाईं, हिसान झापाका सचिव देबेन्द्र हुमागाईं लगायतको आतिथ्यता रहेको थियो ।
