नेपाल शिक्षक संघ झापाले जिल्लाका १४ पालिकामा प्रतिनिधि सभा सम्पन्न गरेको छ ।
यसैबीच शिक्षक संघ गौरादह नगर कार्यसमितिको पाँचौँ प्रतिनिधि सभा आइतबार सम्पन्न भएको छ ।
नेपाली काँग्रेस गौरादह नगर सभापति गोपाल कोइरालाको प्रमुख आतिथ्य तथा शिक्षक संघ संघीय सदस्य शिवहरि ढकाल एवम् संघका जिल्ला सह-सचिव युवराज कट्टेलको विशिष्ट आतिथ्यता रहेको कार्यक्रममा शिक्षक संघमा आबद्ध गौरादह नगरअन्तर्गत रहेका विभिन्न विद्यालयका प्रधानाध्यापक एवम् शिक्षकहरूको उपस्थिति रहेको थियो ।
गौरादह नगरपालिका वडा नम्बर २ स्थित वीपी स्मृति सभाहलमा आयोजित कार्यक्रममा नेपाली शिक्षक संघमा आबद्ध रहेर यही वर्ष २०८१ मा अनिवार्य अवकाश हुँदै सेवा निवृत्त भएका शिक्षकहरूलाई सम्मान गरिएको थियो ।
सम्मानित हुने शिक्षकहरूमा भारती प्राथमिक विद्यालय गौरादह-७ का प्रधानाध्यापक हिरालाल ताजपुरिया तथा सूर्योदय आधारभूत विद्यालय गौरादह-४ का शिक्षक वेनुप्रसाद अधिकारी रहेका छन् ।
गौरादहका कार्यसमिति सदस्य जिवनाथ सिटौलाले स्वागत गरेको कार्यक्रममा प्रमुख अतिथि गोपाल कोइराला, केन्द्रीय सदस्य शिवहरि ढकाल, जिल्ला सह-सचिव युवराज कट्टेल, नेपाल शिक्षक महासंघ गौरादहका पूर्व अध्यक्ष बाबुराम भण्डारी, निवृत्त शिक्षक हिरालाल ताजपुरियालगायतले सम्बोधन गरेका थिए ।
गौरादह नगर समिति सचिव जगत प्रसाईंले सञ्चालन गरेको कार्यक्रममा नेपाल शिक्षक संघ गौरादहका कार्यबाहक अध्यक्ष एवम् कार्यक्रमका सभापति हेमकुमार बरालद्वारा नेपाल शिक्षक संघ गौरादहको २०८१ को साङ्गठनिक प्रतिवेदन पेस गरिएको थियो ।
त्यसैगरी नेपाल शिक्षक संघ शिवसताक्षीको प्रतिनिधि सभा पनि आइतबार सम्पन्न भएको छ ।
नेपाल शिक्षक संघ शिवसताक्षीका सभापति विष्णु सुव्बाको अध्यक्षता भएको कार्यक्रममा नेपाल शिक्षक संघ झापाका उपाध्यक्ष कुमार खतिवडाको प्रमुख आतिथ्यता रहेको थियो ।
उक्त अवसरमा उत्कृष्ट शिक्षक सम्मान, अवकाश प्राप्त शिक्षकलाई सम्मानसहित बिदाई गरिएको अध्यक्ष सुव्बाले जानकारी दिए ।
