झापाको बिर्तामोड-१० मा अवस्थित लक्ष्मीनारायण आधारभूत विद्यालयलाई बेष्ट लाइब्रेरी अवार्ड २०२४ बाट सम्मान गरिएको छ ।
थाङ्ग फाउन्डेसन अफ नेदरल्यान्डले स्थापना गरेका विभिन्न लाइब्रेरीहरु मध्येबाट लक्ष्मीनारायण आविलाई उत्कृष्ट कार्य गरेबापत उक्त अवार्ड प्रदान गरिएको हो ।
विद्यालय व्यवस्थापन समितिका अध्यक्ष तोमप्रसाद ओलीको अध्यक्षतामा भएको कार्यक्रमको प्रमुख अतिथि थाङ्ग फाउन्डेसनका सेक्रेटरी मार्लिन फिसर भर्गिउ र विशिष्ट अतिथि टोन फिसर भर्गिउ र यशु श्रेष्ठ रहेका थिए ।
विद्यार्थीहरुले फूलका गुच्छा दिएर अतिथिहरुलाई स्वागत गरेको कार्यक्रममा विद्यालय व्यवस्थापन समितिका अध्यक्ष ओली, तुलसीप्रसाद सुवेदी, शम्भुप्रसाद घिमिरे, खडानन्द आचार्य लगायतले खादा र माला लगाएर सम्मान गरेका थिए ।
प्रधानाध्यापक जनकबहादुर थापालाई अवार्ड प्रदान गर्दै मार्लिन फिसर भर्गिउले लक्ष्मीनारायण आविले पुस्तकालयको क्षेत्रमा विद्यालयले गरेको योगदानलाई कदर गर्दै सम्मान गरिएको बताइन् ।
उनले थाङ्ग फाउन्डेसनले मात्र सबै कार्य नियमित गर्न नसक्ने भएकाले स्थानीयस्तर र अभिभावकहरु पनि जोडिनु पर्ने बताएकी छन् ।
सोही अवसरमा नेपालका ख्याति प्राप्त वरिष्ठ बाल कथाकार यशु श्रेष्ठले शिक्षक र विद्यार्थीहरुलाई कथा सुनाएर नमुना प्रदर्शन गर्नुका साथै बालबालिकाहरुले विभिन्न रोचक नृत्य प्रस्तुत गरेका थिए ।
विद्यालय र पुस्तकालयको बारेमा प्रधानाध्यापक थापाले प्रष्ट पारेको कार्यक्रमको सञ्चालन शिक्षक निर्मला न्योपानेले गरेकी थिइन् ।
