मनकामना सेकेन्डरी स्कुलले २६ औं वार्षिकोत्सव कार्यक्रम आज सम्पन्न गरेको छ ।
झापाको बिर्तामोड-१ मा सञ्चालित विद्यालयले सांस्कृतिक तथा सम्मान कार्यक्रम गरेर वार्षिकोत्सव मनाएको हो ।
विद्यालय ब्यवस्थापन समितिका अध्यक्ष कुमार बस्नेतको अध्यक्षतामा भएको कार्यक्रममा निजि तथा आवसीय विद्यालय अर्गनाइजेशन नेपाल (प्याब्सन) झापाका अध्यक्ष छत्रबहादुर कार्कीको प्रमुख आतिथ्य रहेको थियो ।
सांस्कृतिक कार्यक्रम अन्तरगत नसंरीदेखि कक्षा १० सम्मका बिद्यार्थीहरुले नुत्य, गायन, नाटक, कराँते, फेसन शो लगायतका कार्यक्रम प्रस्तुति गरेको विद्यालयका प्रिन्सिपल केशव ढुङ्गानाले जानकारी दिए ।
शैक्षिक संयोजक शारदाप्रसाद थपलियाले विद्यालयको शैक्षिक गतिविधिका बारेमा जानकारी गराएको कार्यक्रममा मनकामनाका क्याम्पस प्रमुख प्रेमप्रसाद भट्टराई, क्याम्पसका सञ्चालक कुमार थपलिया, भेषराज चम्लागाई, राम बुढाथोकी, लालीगुँरास स्कुलका संस्थापक उत्तम कटुवाललगायतको आतिथ्य रहेको थियो ।
सोही कार्यक्रमकाबीच विद्यालयमा अध्ययन गरेर नेपालकै विभिन्न क्षेत्रमा रहँदै आएका आठ जना पूर्व विद्यार्थी, वर्ष उत्कृष्ट शिक्षक, कर्मचारी, दुई जोडी अभिभावकलाई सम्मान गरिएको छ ।
सम्मानीत हुनेहरुमा पूर्व विद्यार्थीहरु कन्चन गुप्ता, पूजा गुप्ता, अजय थपलिया, बिस्टीना नेपाल, साधना गिरी, सिद्धान्त थपलिया र सविन अधिकारी छन् ।
उक्त अवसरमा वर्ष उत्कृष्ट शिक्षकका रुपमा शिक्षिका आयुशा दाहाललाई नगद पाँच हजारसहित दोसल्लाले सम्मान गरिएको थियो ।
त्यस्तै कर्मचारीमा चालक प्रताप पुरी र चित्रबहादुर भारती छन् । उत्कृष्ट अभिभावकका रुपमा पूर्णबहादुर पुरी र उनकी धर्मपत्नि, तोपलाल राजवंशी र उनकी धर्मपत्निलाई सम्मान गरिएको थियो भने कक्षा १० का विद्यार्थीहरुलाई मायाको चिनो प्रदान गरिएको थियो ।
कक्षा युकेजीमा अध्ययनरत सोनिया लिम्बु र सम्पदा चम्लागाईले स्वागत गरेको उद्घाटन कार्यक्रमको सञ्चालन शिक्षिका आयुशा दाहालले गरेकी थिइन् ।
