झापाको अर्जुनधारा नगरपालिका वडा नं.१ सिस्नेमा अवस्थित सिंहदेवि माध्यमिक विद्यालयमा बी.एन्ड.सी अस्पताल तथा पूर्वाञ्चल क्यान्सर अस्पतालको सहयोगमा निर्मित भवन माघ २१ गते हस्तान्तरण गरिने भएको छ ।
विद्यालयको ६६ औँ वार्षिकोत्सव तथा सरस्वती पूजाको अवसर पारेर बी.एन्ड.सी तथा पूर्वाञ्चल क्यान्सर अस्पतालका निर्देशक दुर्गा प्रसाईं र इन्दिरा गिरीले संयुक्तरुपमा भवन उद्घाटन तथा हस्तान्तरण सोमबार गर्ने कार्यक्रम रहेको विद्यालय व्यवस्थापन समितिका अध्यक्ष विष्णुलाल ढकालले जानकारी दिए ।
विद्यालयको स्थलगत अनुगमनमा आएका बी.एन्ड.सी अस्पतालका निर्देशक प्रसाईंले विद्यार्थीलाई अध्ययनका लागि कक्षा कोठाको अभावमा असहज भएको देखेरे भवन निर्माणका लागि दुई करोड रुपैँयाँ घोषणा गर्दै प्रसाईं स्वयंले वि.सं.२०७८ भदौ ४ गते व्यापक जनसहभागितामा दुई तले आठ कोठे भवनको शिलान्यास गरेको अध्यक्ष ढकालले बताए ।
अर्जुनधारा नगरपालिका क्षेत्रमा नै सबैभन्दा धेरै निजी सहयोगीको लगानीमा निर्माण भएको भवन यस क्षेत्रका लागि ठूलो उपहार रहेको प्रधानाध्यापक लक्ष्मीप्रसाद रिजालले बताए ।
प्रधानाध्यापक रिजालका अनुसार भवन हस्तान्तरण तथा वार्षिकोत्सव कार्यक्रमको तयारी समेत अन्तिम चरणमा पुग्नुका साथै कार्यक्रममा राष्ट्रियस्तरका कलाकार तथा विद्यार्थीको साँस्कृतिक प्रस्तुति रहने जनाएका छन् ।
भवन उद्घाटनका दिन विद्यालयमा बी.एन्ड.सी.मेडिकल कलेजको सहयोगमा नि:शुल्क स्वास्थ्य शिविर पनि समेत सञ्चालन गरिने प्रधानाध्यापक रिजालले बताए ।
विद्यालयमा नयाँ भवन निर्माण भएसँगै अध्ययनका लागि सहज हुने विद्यार्थी सुस्मिता खतिवडाले बताउँछिन ।
विद्यालयमा विज्ञान प्रयोगशाला भएतापनि सानो कक्षाबाटै प्रयोगशालाबाट सिक्ने वातावरण भएको खण्डमा अध्ययनमा अझ मद्दत पुग्ने उनको भनाइ छ ।
विद्यालयमा भवन बनेसँगै कक्षा कोठाको अभावका कारण खेप्नु परेको समस्याबाट छुटकारा मिलेको विद्यार्थी आकृति आचार्यले बताइन् ।
विद्यालयमा अक्षय कोष, विभिन्न छात्रवृत्ति कोष स्थापना भएता पनि शैक्षिक गुणस्तर वृद्धिका लागि पर्याप्त नभएकाले वार्षिकोत्सवको अवसरमा यस वर्षबाट विद्यालय सुधार कोषको शुभारम्भ गर्ने कार्यक्रम समेत रहेको अध्यक्ष ढकाल बताउँछन् । वि.सं.२०६० सालदेखि माध्यमिक तहको पठनपाठन सुरु भएको विद्यालयमा ७०० जनाभन्दा बढी विद्यार्थी र ३१ जना शिक्षक तथा कर्मचारी कार्यरत रहेका छन् ।
शिक्षा महासंघ अर्जुनधाराका अध्यक्ष तथा विद्यालयका शिक्षक चन्द्र खत्रीले विद्यालयमा माध्यमिक तहलाई पुग्ने गरिको विज्ञान प्रयोगशाला साथसाथै कम्प्युटर तथा स्मार्ट बोर्डको व्यवस्था रहेको बताए ।
विद्यालयमा विद्यार्थीको संख्या धेरै भएकाले विज्ञान प्रयोगशालामा एकैचोटी सिकाउन जनशक्तिको अभाव भएका कारण सिफट व्यवस्थापन गरेर गर्नुपर्ने भएकाले समयको अभाव र खर्च व्यवस्थापन गर्न समस्या रहेको उनी बताउँछन् ।
कोठा अभाव भएका कारण कम्प्युटर व्यवस्थापन गर्न असहज भइरहेको समयमा अस्पतालले भवन निर्माण गर्देसँगै विद्यार्थीलाई अध्ययनका लागि सहज हुने शिक्षक खत्रीको भनाइ छ ।
यसैबीच प्रधानाध्यापक रिजालले भवन उद्घाटन तथा हस्तान्तरण कार्यक्रमलाई सफल बनाउन सम्पुर्णमा उपस्थितिका लागि आग्रह समेत गरेका छन् ।
