झापाको झापा गाउँपालिकाले २९१ जना विद्यार्थीलाई साइकल वितरण गरेको छ ।
पालिका प्रमुख प्रशासकीय अधिकृत गजेन्द्र थपलियाको अध्यक्षता एवं पालिका कार्यवाहक अध्यक्ष अन्जुदेवी थपलियाको प्रमुख आतिथ्यतामा सामुदायिक विद्यालयमा कक्षा ९ मा अध्यनरत छात्रछात्रालाई साइकल वितरण गरिएको थियोे ।
डिल्लीराज माविका ७७ जना, जनता माविका १४० जना, जनकल्याण माविका ४२ जना, कुवाडी माविका १३ जना र महेन्द्र माविका १९ जना छात्रछात्रालाई साइकल पालिकाको निति तथा कार्यक्रम मार्फत शिक्षामा छुट्टाएको बजेटबाट वितरण गरिएको हो ।
पालिका भवनमा शुक्रबार आयोजित विशेष कार्यक्रममा उनीहरुलाई पालिकाको २०८१/०८२ को शिक्षामा बिनियोजन गरिएको बजेट मार्फत टेन्डरबाट २९१ साइकल १२ लाख बराबरको खरिद गरि वितरण गरिएको हो ।
शिक्षा शाखाको आयोजनामा भएको साइकल वितरण कार्यक्रममा बोल्दै कार्यबाहक अध्यक्ष थपलियाले कोहि पनि विद्यार्थीले उच्च शिक्षाको लागि विद्यालय जानबाट बन्चित नहोस् भनेर झापा गाउँपालिकाका पाँच माध्यमिक विद्यालयमा अध्यनन गर्ने विद्यार्थीलाई साइकल उपलब्ध गराएको बताएकी छन् ।
साइकल वितरण कार्यक्रममा वडा नं.७ का अध्यक्ष सखिचन्द्र मण्डल, शिक्षा समिति सदस्य एवं शिक्षक महासंघ अध्यक्ष जगन्नाथ राजवंशी, शिक्षक महासङका सचिव टीकाप्रसाद कट्टेल, साइकल प्राप्त गर्ने विद्यार्थी जनता माविका राजेस खड्का र कुवाडीदेवी माविकी रोजिना घोर्षानी लगायतले मन्तव्य राखेका थिए ।
शिक्षा शाखा पाचौं कर्मचारी अम्बिका गौतमले मन्तव्यबाट स्वागत गरेको कार्यक्रमको सहजीकरण शिक्षा शाखा प्रमुख जीवन ढकालले गरेका थिए ।
झापा गाउँपालिकामा २०७५ सालदेखि अध्यक्ष जयनारायण शाहले साइकल छात्राहरुलाई दिदै आएकोमा दोस्रो कार्यकालमा भने छात्रछात्रा दुबैलाई दिन सुरु गरेको र त्यसै लोकप्रिय कार्यक्रमलाई पालिकाले निरन्तरता दिदै आएको हो ।
