रोटरी क्लब अफ बिर्तामोडले अर्जुनधारा-९ बाह्रघरेस्थित श्री आधारभूत विद्यालयमा वृहत आँखा शिविर तथा सयभन्दा बढी विद्यार्थीहरूलाई स्टेशनरी वितरण कार्यक्रम सम्पन्न गरेको छ ।
क्लबका प्रेसिडेन्ट सुरेशकुमार अग्रवाल ‘भद्रपुरे’को अध्यक्षतामा भएको कार्यक्रमको प्रमुख अतिथि अर्जुनधारा-९ का वडाध्यक्ष भिष्मप्रसाद मिश्र रहेका थिए ।
शिविरमा मेची आँखा अस्पतालको प्राविधिक सहयोग रहेको कार्यक्रममा बाह्रघरे आमा समूह र श्री आधारभूत विद्यालयको विशेष सहयोग रहेको थियो ।
विद्यालय व्यवस्थापन समितिका अध्यक्ष जितेश योञ्जनले विद्यालयमा रहेका समस्याबारे अवगत गराएका थिए भने प्रधानाध्यापक सुजाता शिवाकोटीले शिविर आयोजक परिवारलाई धन्यवादसहित आफ्नो मन्तव्य राखेकी थिइन् ।
९० विद्यार्थीसहित ४८० जना विरामीहरुको आँखा परीक्षण गरिएको शिविरमा मोतीविन्दु अपरेसनका लागि ३१ जना विरामीहरुलाई रेफर गरिएको शिविर संयोजक रिता चितलांगियाले जानकारी दिइन् ।
२०७६ सालमा विद्यालयमा स्वच्छ खानेपानीको लागि आर ओ फिल्टर मेसिन लगाएको र यस वर्ष ट्यांकी थप गरी पुन: मर्मत सम्भार गरेको रोटरी क्लब अफ बिर्तामोडले आँखा शिविर आयोजनासँगै स्टेशनरी वितरण गरेपछि विद्यालयले क्लबलाई सम्मानसमेत गरेको छ ।
क्लबका सर्भिस प्रोजेक्ट डाइरेक्टर सुरेश वंशलले मन्तव्यबाट स्वागत गरेको कार्यक्रमको सञ्चालन विद्यालयकी पूर्व प्रधानाध्यापक कल्पना दाहालले गरेकी थिइन् ।
