झापाको भद्रपुर नगरपालिकाले आइतबार स्थानीय बिदा दिएको छ ।
नगरपालिकाले चौथो बालमैत्री स्थानीय शासनयुक्त नगर घोषणा दिवसको अवसरमा नगर क्षेत्रभित्र पुस ७ गते स्थानीय विदा दिएको हो ।
नगरपालिकाको सातौ नगर सभाबाट प्रत्येक वर्ष पौष ७ गतेका दिन बालमैत्री स्थानीय शासनयुक्त नगर घोषणा दिवस मनाउने र स्थानीय विदा समेत दिने निर्णय भए बमोजिम आइतबार स्थानीय बिदा दिएको प्रमुख प्रशासकीय अधिकृत सुनिल निरौलाले जानकारी दिए ।
उक्त विदाका दिन अत्यावश्यक सेवा बारुणयन्त्र र सरसफाई बाहेक भद्रपुर नगरपालिका, नगर कार्यपालिकाको कार्यालय, वडा समितिको कार्यालयहरु तथा नगरपालिका अन्तर्गतका निकाय र विद्यालयहरुमा स्थानीय बिदा दिएको प्रमुख प्रशासकीय अधिकृत निरौलाले बताए ।
तत्कालीन नगर प्रमुख जीवनकुमार श्रेष्ठ तथा उपप्रमुख चन्द्रा श्रेष्ठ रहेको कार्यकालमा भद्रपुर बालमैत्री नगरपालिका घोषण भएको थियो । भद्रपुर देशको पाँचौं तथा कोशी प्रदेशको पहिलो बालमैत्री स्थानीय तह रहेको छ ।
प्रमुख प्रशासकीय अधिकृत निरौलाका अनुसार बालमैत्री स्थानीय शासनयुक्त नगर घोषणा दिवसको अवसरमा भद्रपुर नगरपालिका, नगर कार्यपालिकाको कार्यालय तथा भद्रपुर नगरपालिका अन्तरगतका विद्यालयहरुले सञ्चालन गर्ने गरी तय गरिएका कार्यक्रमहरु भने यथावत रूपमा सञ्चालन गर्न आग्रह गरेका छन् ।
