नेपाल प्रिमियर लिग (एनपीएल) क्रिकेटमा पोखरा एभेन्जर्सले विराटनगर किङ्ग्सलाई ‘सुपर ओभर’ मा हराउँदै दोस्रो जीत हात पारेको छ ।
पोखराले विराटनगरलाई १३ रनले हराएको हो ।’सुपर ओभर’ मा पोखराले दिएको १९ रनको लक्ष्य पछ्याएको विराटनगरले ५ रन मात्र बनाउन सकेको थियो ।
यसअघि विराटनगरले दिएको १ सय ४० रनको लक्ष्य पछ्याएको पोखराले २० ओभरमा ६ विकेट गुमाएर १ सय ३९ रन बनाएपछि खेल ‘सुपर ओभर’ मा पुगेको हो ।
एनपीएलमा यो पहिलो ‘सुपर ओभर’ हो । पोखराका आन्द्रेस गौसले ३९, रेमोन रेफरले नटआउट ३४ रन बनाए । विराटनगरका प्रतिस जिसीले ४ विकेट लिएका थिए ।
यसअघि कीर्तिपुरको त्रिवि क्रिकेट मैदानमा टस जितेर ब्याटिङ गरेको विराटनगरले २० ओभरमा ७ विकेट गुमाएर १ सय ३९ रन बनायो । विराटनगरका स्कट इडवार्ड्सले ४५ रन बनाए । पोखराका सागर ढकाल र रेमोन रेफेरले २-२ विकेट लिएका थिए ।
यो जीतसँगै पोखरा ५ खेलमा ४ अङ्कसहित तालिकाको छैटौं स्थानमा छ । विराटनगर ५ खेलमा २ अङ्कसहित पुछारमा छ ।
त्यस्तै आज भएको दोश्रो खेलमा काठमाडौँ गुर्खाजलाई ५ विकेटले हराउँदै जनकपुर बोल्ट्स एक खेलअघि नै प्लेअफमा पुगेको छ ।
काठमाडौँले दिएको १ सय २ रनको लक्ष्य जनकपुरले १५ ओभर ५ बलमा ५ विकेट गुमाएर भेटायो । जनकपुरका जेम्स नीशमले २७ र हर्ष ठाकरले नटआउट २५ रन बनाए । काठमाडौँका कप्तान करण केसीले २ विकेट लिएका थिए ।
यसअघि कीर्तिपुरको त्रिवि क्रिकेट मैदानमा टस जितेर ब्याटिङ गरेको काठमाडौँ १९ ओभर ३ बलमा १ सय १ रनमा अलआउट भयो । काठमाडौँका गेरहार्ड इरस्मसले २० र कप्तान करण केसीले १९ रन बनाए । जनकपुरका ललित राजवंशी र शेर मल्लले ३-३ विकेट लिएका थिए
यो जीतसँगै जनकपुर ६ खेलमा १० अङ्कसहित तालिकाको शीर्ष स्थानमा उक्लिएको छ । जनकपुर प्लेअफमा पुग्ने पहिलो टोली बनेको छ । काठमाडौँ ५ खेलमा ४ अङ्कसहित पाँचौं स्थानमा छ ।
