झापाको मेचीनगर-१३ चारआलीमा रहेको त्रिदेव बहुमुखी क्याम्पसले चार जनालाई सम्मान गरेको छ ।
क्याम्पसको १७ औं क्याम्पस सभाको अवसर पारेर सोमवार प्राध्यापक र कर्मचारी गरी चार जनालाई सम्मान गरेको हो ।
यसरी सम्मानित हुनेहरुमा प्राध्यापकतर्फ विवेक उप्रेती, मातृका पोखरेल र कर्मचारीतर्फ कार्यालय सहायक राजन कट्वाल तथा सह-लेखापाल प्रदिप चौधरी रहेका छन् ।
उद्घाटन कार्यक्रमका प्रमुख अतिथि मेचीनगर नगरपालिका उपप्रमुख मीना पोख्रेल उप्रेती, विशिष्ट अतिथि क्याम्पस सञ्चालक समितिका संस्थापक अध्यक्ष हरिचरण बानियाँ, क्याम्पस प्रमुख माधव प्याकुरेललगायतले दोसल्ला ओढाएर सम्मानपत्रसहित संयुक्तरुपमा सम्मान गरेका थिए ।
उद्घाटन सत्रमा प्रमुख अतिथि उपप्रमुख उप्रेती, विशिष्ट अतिथि क्याम्पस सञ्चालक समितिका संस्थापक अध्यक्ष बानियाँ, निवर्तमान अध्यक्ष सन्तोष न्यौपाने, दाताहरुका तर्फबाट दिलिप कार्कीलगायतले बोलेका थिए ।
क्याम्पस सञ्चालक समितिका अध्यक्ष हरिप्रसाद घिमिरेको अध्यक्षतामा भएको उद्घाटन सत्रमा क्याम्पस प्रमुख प्याकुरेलले प्रगति प्रतिवेदन प्रस्तुत गरेका थिए ।
क्याम्पस सञ्चालक समिति सदस्य भक्त खेवाङले मन्तव्यबाट स्वागत गरेको कार्यक्रमको सञ्चालन प्राध्यापक सावित्रा दाहाल भट्टराईले गरेकी थिइन् ।
