झापा। सुस्तगतिमा निर्माण भइरहेको बिर्तामोड–भद्रपुर सडकको बाँकी खण्ड पनि स्तरोन्नति हुने भएको छ । जसका लागि संघीय सरकारले वहुवर्षीय आयोजनामा समेट्दै रकम विनियोजन गरेको छ ।
पहिलो खण्ड मुक्तिचोकबाट शुरु भई ४ किलोमिटर सडक निर्माणका लागि अहिले काम भइरहेको छ भने दोस्रो चरणमा भद्रपुरसम्म नै बाँकी रहेको ८.५ किलोमिटर सडक खण्डलाई पनि चार लेनकै बनाएर लाने प्रतिनिधिसभा सदस्य तथा अन्तर्राष्ट्रिय समन्वय समिति सभापति पवित्रा निरौला खरेलले जानकारी दिइन् । बहुवर्षीय योजना अन्तर्गत सडक निर्माणका लागि टेन्डर आह्वान भएको र लगत्तै निर्माण कार्य शुरु गरिने उनको भनाइ छ ।
अब बिर्तामोड–भद्रपुर सडक खण्डको सबै क्षेत्र चार लेनको हुन्छ– निरौलाले भनिन्– वहुवर्षीय योजना हो जतिसक्दो चाँडो बिर्तामोड–भद्रपुर सडक निर्माण सम्पन्न गर्ने योजनाका साथ काम अघि बढाइन्छ ।
सडक एक अर्ब २८ करोड रुपैयाँको लागतमा निर्माण हुन लागेको बताइएको छ । पहिलो चरणमा निर्माण थालिएको सडकको समेत ८६ प्रतिशत निर्माण कार्य सम्पन्न भएको बताउँदै बाँकी काम द्रुत गतिमा अघि बढ्ने निरौलाको भनाइ छ ।
पहिलो चरणमा निर्माण थालिएको बिर्तामोड–भद्रपुर सडकखण्ड पनि चार लेनकै रहेको छ ।
बजार क्षेत्र २.८ किलोमिटर दुर्वतर्फ नालासहितको हुनेछ भने बाँकी सडक चार लेनको मात्रै हुनेछ । पहिलो चरणको काम आशीष प्रेरा जेभी काठमाडौंले २७ करोड ९ लाख ७० हजार ९६ रुपैयाँ ५८ पैसा (भ्याट तथा पीएम सहित)को लागतमा निर्माण कार्य अघि बढाएको थियो । तर, काम भने कछुवाको गतिमा रहेको सरोकारवालाले बताउँदै आएका छन् । सडक निर्माणको अवधिमा सम्पन्न हुन नसकेपछि सो सडक निर्माणका लागि पटक–पटक म्याद थपिएको थियो । पछिल्लोपटक २०७७ साउन २८मा सम्झौता संशोधन भएको छ । बिर्तामोडलाई स्मार्ट सिटीको अवधारणा अन्तर्गत सो सडक निर्माण गर्दा दुवैतर्फ नाली राखेर काम थालिए पनि समयमा काम भने सम्पन्न हुन सकेको छैन । निर्माण व्यवसायीले समयमा सडक निर्माणको काम सम्पन्न नगरेको भन्दै बिर्तामोडका व्यवसायीले पटक–पटक दवावमूलक कार्यक्रम समेत गरे । तर, अहिले पनि काम भने कछुवाकै गतिमा रहेको स्थानीयको भनाइ छ ।
मुक्तिचोकबाट शुरु भएको पहिलो चरणको काम सम्पन्न गर्न भौतिक पूर्वाधार तथा यातायात मन्त्रालयले १८ महिनाको समय अवधि राखेर चार किलोमिटरमध्ये २.८ किलोमिटर सडक १६ मिटर चौडाई, एक मिटर नाली र फुटपाथसहित जम्मा २३ मिटर चौडा हुने गरी निर्माणका लागि सम्झौता भएको थियो ।
यो चार लेनको बन्ने र बाँकी सडक सात मिटर चौडाईको दुई लेनको बन्ने भनिएको थियो । पाँच सेन्टिमिटरसम्म आस्फाल कंक्रिट प्रयोग गरी सडक निर्माण गर्ने बताइए पनि पछि सबै सडक चार लेनको बनाउन प्रधानमन्त्री केपी शर्मा ओलीले निर्देशन दिएपछि सो सडक चार लेनको बन्न लागेको हो ।
जिल्लाको प्रमुख व्यापारिक केन्द्र बिर्तामोडदेखि सदरमुकाम भद्रपुरसम्मको सडकखण्ड भत्किएको वर्षाैं बिते पनि बन्न सकेको थिएन । एशियाली विकास बैंक (एडीबी)को सहयोगमा पाँच वर्षअघि नै उक्त सडक निर्माणको ठेक्का लागेको थियो ।
सडक निर्माणको काम सुस्त गतिमा अघि बढेसंगै प्रतिनिधिसभा सदस्य खरेलले सडक निर्माणलाई तीब्रता दिन निर्माण व्यवसायीलाई निर्देशन दिएको बताइएको छ । यता दोस्रो चरणमा स्तरोन्नति हुन लागेको सडक समेत निरौलाकै पहलमा चार लेनको बन्न लागेको हो ।
पुल निर्माण पनि कछुवाकै गतिमा
भौतिक पूर्वाधार तथा यातायात मन्त्रालय अन्तरगत बिर्तामोडस्थित अन्धुवा खोलामा पुल निर्माण भइरहेको छ । २०७४ साल असार २९ गते पुल निर्माणका लागि सम्झौता भएको र समयमा निर्माण सम्पन्न नभएपछि म्याद थप गरिएको छ ।
पूर्व–पश्चिम महेन्द्र राजमार्ग अन्तर्गत निर्माण भइरहेको पुल सात करोड १५ लाख, चौरानव्वे हजार पाँच सय ८० रुयैयाँ तीन पैसा (भ्याट तथा पीएम सहित) को लागतमा निर्माण भइरहेको छ ।
पुल निर्माणको ८६ प्रतिशत काम सम्पन्न भएपनि वाँकी काम अझैं सम्पन्न हुन सकेको छैन । पुल निर्माणमा ढिलाई भएसंगै स्थानीयले अहिलेपनि सास्ती व्यहोर्दै आएका छन् ।श्रोतःपूर्वाञ्चल दैनिक
