झापा ।व्यवसायीको विरोधपछि पूर्वी नाका काँकडभिट्टामा राखिएको होल्डिङ सेन्टर हटाइएको छ ।
कोरोना भाइरसको महामारीपछि संक्रमण रोकथाम तथा नियन्त्रणका लागि मेचीनगर नगरपालिका- ६ स्थित काँकडभिट्टामा माविको खेल मैदानमा राखिएको होल्डिङ सेन्टर मङ्गलवार हटाइएको हो ।
भारतबाट आउने नागरिकलाई लक्षित गरी सो होल्डिङ सेन्टर जिल्ला प्रशासन कार्यालय झापाले स्थापना गरेका थिए ।
होटेल व्यवसायी सङ्घ मेचीनगर र ट्राभल्स सङ्घ झापाले होल्डिङ सेन्टर हटाउनु पर्ने र नाका खोल्नु पर्नेमा माग राख्दै सीमा नाका प्रदर्शन गरेका थिए ।
सोही दबाबपछि प्रशासनले अन्ततः होल्डिङ सेन्टर हटाएको हो । होल्डिङ सेन्टर हटाए लगतै अहिले मेची भन्सार कार्यालयको गेटमै हेल्थ डेस्कको व्यवस्था गरिएको छ ।
सोही डेस्कमा प्रशासनको सहकार्यमा प्रारम्भिक स्वास्थ्य चेकजाँच गरी नेपाल प्रवेश गराई आआफ्नो गन्तव्यतर्फ पठाइने भएको छ । यसअघि कोरोनाको पिसीआर रिपोर्ट र स्थानीय तहको सिफारिस नभएका नागरिकलाई होल्डिङ सेन्टरमा पठाउने र त्यहाँबाट गन्तव्यतर्फ पठाइने गरिन्थ्यो ।
प्रशासन कार्यालय मातहतमा रहेको होल्डिङ सेन्टरको व्यवस्थापन सोही अनुसार रहने गरी त्यसलाई स्थानान्तरण मात्र गरिएको इलाका प्रहरी कार्यालय काँकडभिट्टाका डिएसपी राजेन्द्र पोख्रेलले जानकारी दिए ।
‘होल्डिङ सेन्टर हटेको नभई ठाउँ मात्र सारिएको हो, डिएसपी पोखरेलले भने, नेपाल प्रवेश गर्ने नेपाली नागरिकलाई अब नाकामै चेकजाँच गरी अभिलेख राखिन्छ र सोझै गन्तव्यतर्फ पठाउने व्यवस्था मिलाइनेछ ।
विद्यालयको खेल मैदानमा विगत ८ महिनादेखि होल्डिङ सेन्टर राखिएको कारण अहिले विद्यालयमा सञ्चालनमा आउने भएपछि पठनपाठनमा समेत असुविधा हुने जनगुनासो बढेको थियो ।
त्यस्तै पर्यटन, होटेल तथा यातायात व्यवसायीले होल्डिङ सेन्टरमा पर्यटक र आगन्तुकसँग मनोमानी ढङ्गमा भाडा असुल्ने गरेको र बेथिति बढ्न थालेको थियो । अहिले पूर्वी नाकाबाट दैनिक सयौँ सङ्ख्यामा दुवै देशका नागरिक आवतजावत गरिरहेका छन् ।
सीमा नाका सिल भए पनि यसको असर भने नाकामा नदेखिएको स्थानीय बताउँछन् ।
