बिर्तामोड नगरपालिकाले बाल बिकासदेखि कक्षा ५ सम्मका विद्यार्थीलाई नि:शुल्क पोशाक वितरण गरेको छ ।
बिर्तामोड नगरपालिकाको आर्थिक सहयोगमा सोमबार एक कार्यक्रमका बीच मदरसा तालिमुल कुरान आधारभूत विद्यालयका अति बिपन्न मुस्लिम समुदायका विद्यार्थीहरुलाई पोशाक वितरण गरिएको हो ।
उक्त कार्यक्रमकी प्रमुख अतिथि बिर्तामोड नगरपालिकाकी नगर प्रमुख पवित्रा महतारा प्रसाईंले नगरपालिकाको निति अनुरुप बिर्तामोडमा रहेका दुई धार्मिक विद्यालयलाई समान अपनत्वका साथ हेरबिचार गर्दै आएको बताएकी छन् ।
सोही अवसरमा मुस्लिम समुदायबाट जग्गा दान गर्ने जग्गा दाता अमरुदीन मिया लगायत मदरसाको स्तर उन्नतीका लागी योगदान पु¥याउने विभिन्न व्यक्तिहरुलाई सम्मान गरिएको थियो ।
बिर्तामोड खानेपानी उपभोक्ता समितिका अध्यक्ष मेघराज बाँस्तोला, एमाले बिर्तामोड नगर कमिटी अध्यक्ष सुवास भट्टराई, बिर्तामोड वडा नं.३ का वडाध्यक्ष मदन बुढाथोकी, शिक्षा शाखाका प्रमुख तिलचन्द भण्डारी लगायतको उपस्थिती रहेको कार्यक्रमको औचित्य माथि प्रकाश मदरसा व्यवस्थापन समितिका अध्यक्ष अफ्रोज खानले गरेका थिए ।
