(झापा) । कर्मचारीमा कोरोना भाइरसको संक्रमण देखिएकाले झापाका दुई स्थानीय तह बन्द गरिएको छ ।
तिहार बिदा अर्थात् मङ्सिर ३ गतेदेखि सबै सरकारी कार्यालय खुल्ला हुनु पर्ने हो । तर, कर्मचारीमा संक्रमण देखिएपछि जिल्लाको बाह्रदशी गाउँपालिका र झापा गाउँपालिका मङ्सिर ३ गतेदेखि पनि सञ्चालनमा नआउने भएको छ ।
दुवै स्थानीय तहले छुट्टाछुट्टै निर्णय गर्दै गाउँपालिका बन्द राख्ने भनी सूचना जारी गरेको छ । बाह्रदशी गाउँपालिकाका एक ओभरसियर कर्मचारीलाई कोरोना संक्रमण पुष्टि भएको छ । उनी हाल होम आइसोलेसनमा बसेका छन्।
कोरोना भाइरसको महामारी अझै सामान्य नभएको भन्दै बाह्रदशीले मङ्सिर ६ गतेसम्म गाउँपालिका अन्तरगतका सबै कार्यालय बन्द राख्ने निर्णय गरेको छ । गाउँपालिका अध्यक्ष खड्गप्रसाद राजवंशीले मङ्गलवार एक सूचना जारी गर्दै मङ्सिर ३ र ४ गते गाउँपालिका कार्यालय, त्यस अन्तर्गतका विषयगत शाखाहरू, वडा कार्यालय , स्वास्थ्य केन्द्र र आधारभूत सेवा केन्द्रहरूको कामकाज बन्द रहने जनाएको छ ।
अब छठ पर्व सकिएर मङ्सिर ७ गतेदेखि मात्र गाउँपालिका कार्यालय नियमित रुपमा सञ्चालन हुने सूचना उल्लेख गरिएको छ । त्यस्तै झापा गाउँपालिकाका १२ जना कर्मचारीहरू संक्रमित छन् । गाउँपालिका एकै पटक एक दर्जन कर्मचारी संक्रमित भएपछि मङ्सिर ९ गतेसम्म कार्यालय बन्द राख्ने निर्णय गरेको छ ।
संक्रमित सबै कर्मचारी हाल होम आइसोलेसनमा बसेकाले मङ्सिर ३ देखि ९ गतेसम्म कार्यालय बन्द रहने गाउँपालिका अध्यक्ष जयनारायण शाहले बताए । सो गाउँपालिका कार्यालय कात्तिक २७ गतेदेखि नै बन्द रहेको छ । कोरोना भाइरसको विषम परिस्थितिका कारण पर्न जाने असुविधाप्रति गाउँपालिकाले क्षमाप्रार्थी भएको उल्लेख गरेका छन् ।
यता जिल्लामा कोरोनाले ८१ जनाको मृत्यु भइसकेको स्वास्थ्य कार्यालय झापाले जनाएको छ । हाल झापामा सङ्क्रमितको सङ्ख्या ३ हजार ६४ पुगेको छ । त्यसमा सक्रिय सङ्क्रमितको सङ्ख्या ११ सय ३० रहेको जनाइएको छ ।
