अर्जुनधारा । झापा अर्जुनधारा नगरपालिका–८ विजुली अफिस पुर्व टोल विकास समिति अन्तर्गत रहेको जलेश्वर किर्तन मण्डलीले आफ्नो प्रथम बार्षिक उत्सव मनाएको छ ।
समितिका अध्यक्ष तारा प्याकुरेलको अध्यक्षतामा भएको कार्यक्रममा टोलका अग्रज व्यक्तित्वहरु काजी रसाइली, मनोरथ सिटौला, राम प्रसाद ढकाल, हिरालाल अधिकारी र हरि शंखर गुप्तालाई सम्मान गरिएको थियो ।
त्यस्तै दाताहरु नरबहादुर थापा मगर, टंक गौतम, मोहन सिंह लिम्बू, बाध्यबाधनमा सहयोग गर्ने चन्द्र गौतम, भजन गायक हेम दाहाललाई सम्मान गरिएको थियो ।
अर्जुनधारा नगरपालिका वडा नम्बर ८ का वडाध्यक्ष कुमार उप्रेतीको प्रमुख आतिथ्यमा सम्पन्न भएको बार्षिकोत्सव कार्यक्रममा वडा सदस्य सरु बुढाथोकी, सुजाता रसाइली र मनोज रैका मगर र टोल समितिका अध्यक्ष पुनम चौहानको आतिथ्य रहेको थियो ।
एक बर्ष अघि स्थापना भएको मण्डलीले प्रत्येक मंगलबार भजन किर्तन मार्फत धार्मिक सेवा गर्दै सु–सस्कृत समाज निर्माणकालागि पहल गर्दै आएको समितिका सचिव रमेश नेपालले जानकारी दिए । जलेश्वर किर्तन मण्डलीमा ८४ घर परिवार आवद्ध रहेका छन् ।
कार्यक्रममा प्रमुख अतिथि वडा अध्यक्ष उप्रेती, अग्रज व्यक्तित्व काजी रसाइली लगायतले शुभकामना व्यक्त गरेका थिए । कार्यक्रममा बोल्दै वडाध्यक्ष उप्रेतीले समाज लाई गतिशील तथा अनुशासित बनाउन धर्म ,संस्कृतिको जगेर्ना गर्नु पर्ने उल्लेख गरे ।
कार्यक्रममा मण्डलीका सदस्य तथा कलाकारहरुले भजन प्रस्तुत गरेका थिए । समितिका सचिव रमेश नेपालले संचालन गरेको कार्यक्रममा कोषाध्यक्ष विनोद चौहानले स्वागत गरेका थिए ।
