प्रधानमन्त्री केपी शर्मा ओलीलाई भेट्न कार्यकारी अध्यक्ष पुष्पकमल दाहाल प्रचण्ड बालुवाटार पुग्नुभएको छ।
सचिवालयको बहुमत सदस्यले बैठकको सहमति माग गर्दासमेत प्रधानमन्त्री ओलीले नदिएपछि पार्टीको मुख्यालय धुमबाराहीमा अध्यक्ष दाहालले सचिवालय बैठक राख्दै हुनुहुन्छ। बैठकअघि अध्यक्ष दाहाल प्रधानमन्त्री ओली भेट्न पुग्नुभएको हो।
अध्यक्ष दाहालसहित वरिष्ठ नेताद्वय झलनाथ खनाल, माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठले शनिबार प्रधानमन्त्री ओलीलाई बैठक राख्ने सहमति दिनका लागि माग गरेका थिए ।
यसअघि पनि सचिवालयका बहुमत सदस्यहरु धुम्बाराहीमा अनौपचारिक बैठक बसेका थिए। अध्यक्ष दाहालले बोलाएको अनौपचारिक बैठकमा ओली खेमाका ईश्वर पोखरेल, विष्णु पौडेल र रामबहादुर थापा बादल सहभागी भएनन्।
प्रधानमन्त्री ओलीले सहमतिबिनै बैठक राखेमा पार्टी फुटको बिन्दु त्यही नै हुने बताउनुभएको थियो। मंगलबार बिहान प्रधानमन्त्रीका विश्वासपात्र लुम्बिनी प्रदेशका मुख्यमन्त्री शंकर पोखरेल खुमलटार पुगेर पार्टीभित्रको विवाद समाधान गर्न अध्यक्षद्वयको सहमतिको विकल्प नभएको बताउनुभएको थियो।
